– Brakka stod på hjul mellom to andre brakker. Det er mest truleg vinden som har teke den med seg i løpet av kvelden i går eller i natt. Då den vart oppdaga hadde den allereie drive 6–8 kilometer mot Skei, fortel Ken Enebakk, driftssjef for Ramirent avdeling Førde.
Brakka som stod trygt plassert ved Årdal i Jølster låg søndag morgon i vasskanten i nærleiken av Skei like ved E39.
– Den har faktisk passert to nes. Det heile er litt ubegripeleg, fortel, Enebakk.
Han tvilar på det har vore hærverk i og med at bremsene var på då dei fant brakka att.
Klokka halv åtte vart han ringt opp om funnet og palmesøndagen gjekk med til redningsaksjon av den 1000 kilotunge brakka.
– Heldigvis den eldste
– Når vinden først skulle reise med ei brakke, valde den heldigvis den eldste, seier Enebakk.
Brakkene var gjort i stand til kontor til arkeologar frå Bergen museum. Dei skal drive arkeologiske utgravingar i samband med E39 forbi Årdal.
- LES OGSÅ: Slik vil dei tryggje E39
«Kontoret» som hamna på Jølstravatnet var innreia med pultar stolar og arkivskap. Lite av det som var i brakka kan brukast, fortel Enebakk.
– Den er heilt totalvrak og mykje vatn hadde kome inn i rommet. Då vi fekk henta den opp frå vatnet delte den seg, seier han.
Men han har heldigvis ei annan som er ledig som vert sett inn i staden.
Trudde bil låg under vatnet
– Svært kjedeleg, konstaterer Enebakk, men er usikker på kor mykje verdi som eigentleg gjekk tapt. Ei heilt ny brakke kostar rundt 100.000 kroner.
Enebakk rosar dei som oppdaga brakka i vatnet og som varsla tidleg.
– Dei trudde først det kunne vere ein bil under vatnet og fekk ringt på til naboar i området, fortel han.
Ein person i nærleiken stilte med gravemaskin og fekk sett i gong redningsaksjonen av den søkkvåte brakka.
- LES OGSÅ:
- LES OGSÅ: