– Vi har tre episodar som på ulikt vis heng saman med oktoberfesten i Stryn, seier Espen Gulliksen ved operasjonssentralen til politiet i Florø.
Det byrja med at ein mann i 20-åra slo ned ein annan mann i 20-åra, og vart sett i arresten for det. Seinare på kvelden vart ein annan mann vist vekk ifrå Stryn sentrum fordi han nekta å syne legitimasjon då politiet ville sjå det.
Like før klokka halv tre fekk ein ny mann beskjed om å halde seg unna Stryn sentrum, fordi politiet meinte han hadde vore eit uromoment.
Alt dette skjedde altså ifølgje politiet i samband med tiårsjubileet til oktoberfesten i Stryn, som samlar mykje folk i bygda i helga.
Set inn ekstra folk
Gulliksen hos politiet fortel at dei i kveld kjem til å ha litt fleire folk på jobb enn det som er vanleg i Stryn.
– Vi kjem til å ha litt ekstra bemanning, så vi skal vere godt budde om det skulle dukke opp nokre hendingar i kveld og.
I resten av fylket har det gått roleg for seg i natt, og politiet har ikkje ein einaste ting å melde utanfor kommunegrensene til Stryn.
