Det var førre veke at Norsk Bremuseum utførte dei årlege målingane av Bøyabreen og Supphellebreen i Fjærland.
Bøyabreen gjekk tilbake 32 meter siste året
Målingane er gjort på vegne av Noregs vassdrags. og Energidirektorat, NVE. Norsk Bremuseum utfører målingane på to regenererte brear, det vil sei brear som er avhengig av is- og snøras frå ein overliggande bre.
Medan Bøyabreen ligg omlag 150 meter over havet, ligg Supphellebreen omlag 60 meter over havet. Det siste året har dei to breane reagert ulikt. For medan Supphellebreen veks har Bøyabreen krympa.
Målingane viser at Bøyabreen er 32 meter kortare denne hausten enn i fjor, medan Supphellebreen har blitt 16 meter lengre.
Fleire årsaker
Norsk Bremuseum skriv i ei pressemelding at årsaka til veksten på Supphellebreen vere dei store snømengdene som fell på Jostedalsbreen i sesongen 2007/2008.
Årsaka til at dette snøfallet ikkje har fått utslag for Bøyabreen kan kome av at dei breane har ulik responstid.
Nedre del av Bøyabreen kan forsvinne om kort tid
Ei anna årsak kan vere at israsa frå den øvre delen av Bøyabreen ikkje lenger fell heilt ned på den regenererte delen.
Utan desse israsa vil den nedre delen av Bøyabreen raskt forsvinne.
Målingane av Bøyabreen i Fjærland tok til i 2003, og sidan då har breen trekt seg tilbake til saman 158 meter.
For Suppehellebreen er statistikken litt annleis, der viser målingane som starta i 1992 at den i løpet av perioden har trekt seg tilbake 25 meter.
I Nordfjord viser målingane av Briksdalsbreen at fronten på breen har gått fram 8 meter sidan i fjor haust. Også her er det mykje snø i sesongen 2007/2008 som vert nemnt som årsak.
- LES OG: