– Det er ikkje kjekt å skulle sende sauene sine på fjellbeite og vite at her går det ei gaupe eller ein jerv. Dei er lystmordarar, seier Flatjord
Ei gruppe på fleire hundre biologar frå universiteta i Oslo og Bergen har levert eit opprop til Stortinget der dei krev meir gaupe på vestlandet.
Uaktuelt
– Nei, vi treng ikkje fleire gauper i Sogn og Fjordane, seier fylkesordførar Jenny Følling (Sp)
Følling stiller seg dermed bak sauebøndene i fylket som rasar mot forslaget, men Naturvernforbundet seier dei støttar oppropet frå biologane.
– Vi støttar biologane i deira krav. Rovdyra har sin heilt naturlege plass, også på Vestlandet. Vi ser at andre land har klart å ha beitedyr i område med mykje rovdyr, seier leiar i Naturvernforbundet, Lars Haltbrekken.
Friområde for rovdyr
For tida går det om lag 350 gauper rundt om i landet vårt, men her i fylket er dyret eit svært sjeldant syn. Det er det fleire som no vil endre på.
– Gaupa er eit vakkert dyr, som er ein del av den opphavlege faunaen vår, seier biolog Harald Kryvi ved Universitetet i Bergen.
Kryvi tar no til orde for å opprette frisoner for gaupe.
– Det som bør opprettast over tid er område for rovdyra, der landbruksinteressene må vike, seier Kryvi.
Marit Flatjord i Sogn og Fjordane Sau og Geit har ikkje tru på at det er mogleg å halde gaupa innanfor avgrensa område.
– Det er fort at det er mykje meir dyr enn det ein trur det er, og då spreier problemet seg utover, seier Flatjord.