– Her er det omtrent som unnarennet på ein hoppbakke. Det er godt over 30 grader, seier Leif Tvinnereim.
Han er i gang med det tidkrevjande arbeidet det er å slå dei bratte teigane på Hopland, med slåmaskin. Maskina er utstyrt med ekstra hjul med stålkantar for å klare seg i bratta.
Teigen Leif Tvinnereim no slår er på fem mål, og han ventar å bruke fem dagar på denne. Fleire veker går med til heile slåtten. Med moderne slåtteutstyr bruker ein gjerne éin dag på hundre mål.
– Eg kan ikkje samanlikne meg med dei, eg må ta det her som ein liten ferie, seier han.
Han skal slå om lag hundre mål med slåmaskina før jobben er gjort.
Traktortrøbbel
Det er mange bratte gardar på nordsida av Nordfjorden, mellom Lote og Stryn, og slåtten har alltid vore ekstra slitsam her.
Lenger inne i bygda har ei ekstra utfordring meldt seg. Der er det såpass flatt at dei kan bruke traktor på delar av garden i slåttonna. Men no har traktoren har stoppa. Dermed kan sommaren sjå ut til å bli lang.
– Viss vi skal hesje alt blir det kanskje åtte veker til. Når traktoren ikkje fungerer, får vi bruke hesjestaur, seier Jonny Tvinnereim.
Det er kanskje ikkje så mange born i dag som veit kva hesjing går ut på, men Rasmus og Rebekka på garden hjelper til med hesjinga i sommar.
– Det er ikkje så veldig kjekt. Viss traktoren ikkje fungerer så kjem det til å ta si tid, seier Rasmus.
Rebekka er einig.
– Det tar veldig lang tid.
Klare for framtida
– Eg skal greie det så lenge eg klarer å gå, men viss det blir slutt på dyreproduksjonen så vil det nok gro til, seier Leif Tvinnereim.
Men inne ved ein silo i bygda står to ungdomar som har lyst til å halde fram med dyr. Eirik og Runar Tvinnereim seier at ein av dei kjem til å ta over ein bratt gard, når den tid kjem.
– Det er morosamt med dyr og å køyre traktor. Og så er det moro når kyrne kalvar og sauene lambar.