NRK Sogn og Fjordane var om bord då veteranbåten i september i fjor la ut på fjordaferd i Sogn. Resultatet kan du sjå i kortdokumentar-serien Glimt av Norge på NRK1.
- NETT-TV: Sjå dokumentaren nedst i denne artikkelen
TV-reportasje vart dokumentar
– Vi var i utgangspunktet om bord i «Atløy» for å laga ein reportasje til Vestlandsrevyen. Det gjorde vi også, men vi fann ut at vi sat på så mykje flotte bilete at fjordaferda fortente eit større publikum, fortel programansvarleg Vidar Gudvangen.
NRK tente på ideen og fotograf og reporter og gjekk om bord att i «Atløy» i Ytre Sogn. Det har resultert ein kortdokumentar der ein møter båt, mannskap og ikkje minst folket langs kaiane.
– Det var på mange måtar ein reisedokumentar. Vi er på tur i vakker Vestlandsnatur i skiftande haustvær. Frå solskinn og blå himmel til regn og stiv kuling, fortel Gudvangen, og legg til:
– Ikkje minst ønskte vi å formidle gleda mange, særleg dei litt opp i åra, stråler ut i møte med denne gamle skuta. Fjordbåtane, som tidlegare Fylkesbaatane sin «Atløy», var viktige bindeledd langs kysten og innover i fjordane. Berre nokre få slike båtar er att i god stand.
- Atløy er i dag eigd av ei stifting. Les meir om veteranbåten her.
Dugnadsanda om bord
Dokumentaren byr også på møte med mannskapet om bord i «Atløy». Alle, med unntak av éin, er i dag pensjonistar. Dei jobbar dugnad om bord, utan løn.
– Spørsmålet er kva som skjer når pensjonistane som i dag lever og andar for denne skuta, er borte. Står nye klare til å ta over. Vil neste generasjon ha same forhold til desse båtane, og vil dei orke å jobbe gratis nærast dag og natt. Dagens mannskap tvilar på om nokon vil ta over, seier Gudvangen.
På fjordaferd tek deg med på tur til veglause Frønningen, Sandnes like ved Fodnes, Solvorn i Luster, Fureneset i Gulen, overfarten over Sognesjøen, Yrøygrend og Hardbakke i Solund.
Programmet er produsert i to utgåver, NRK1 viste i tysdag kveld versjonen på ni minutt. Ein lengre 14-minuttsversjon vil bli sendt ved seinare høve. Her vert det også landligge på Mjømna i Gulen.