Øydeleggingane etter orkanen i jula i fjor var enorme. Også på linjenettet der hundrevis av tre hadde lagt seg over ende og førte til store problem.
Det siste året har selskapa brukt mykje tid på å rydde opp, men også på å bu seg på nye stormar. 11 månader etter uvêret sine herjingar meiner dei at dei vil kunne takle nye stormar betre.
– 99 prosent av feilen
Skogrydding rundt linjenettet er det mest konkrete tiltaket kraftselskapa har gjort for å hindre like omfattande straumbrot ved ein ny orkan.
For det var nettopp skog som vart lagt ned av vinden som øydela mest av alt under Dagmar, fortel nettsjef Asgeir Aase i Sogn og Fjordane Energi.
– 99 prosent av feila var ikkje på grunn av feil på nettet, men på grunn av skog som la seg over linjene, seier Aase.
- LES OGSÅ:
- LES OGSÅ:
(Artikkelen held fram under biletet)
Har lagt om frå luft til kabel
Tusenvis vart utan straum i tida etter orkanen. Ein ringerunde NRK har gjort viser at kraftselskapa har gjort grep i løpet av dei 11 månadene som har gått sidan uvêret.
I tillegg til skogrydding har også utbetring av interne samband, og oppdaterte tiltaksplanar stått på dagsorden.
Nettsjef Harald Stadheim i Sognekraft seier jordkabling av linjer har blitt meir aktuelt etter uvêret sine herjingar.
– Vi har konkrete eksempel på at vi har lagt om frå luft til kabel. Det har vi gjort for å eliminere risikoutsette trasear på enkelte strekningar, fortel Stadheim.
- LES OGSÅ:
- LES OGSÅ:
- LES OGSÅ: –
Vi har gjort ein skikkeleg innsats
Kraftselskapa i Sogn og Fjordane er alle samde om at erfaringane frå romjula har gjort dei betre rusta for nye stormar.
– Eg trur vi, kommunane i fylket, og dei andre kraftselskapa totalt sett har løfta seg i forhold til Dagmar. Det er eg ikkje i tvil om, seier Helge Robert Midtbø i Sunnfjord Energi.
Han får støtte frå nettsjefen i Sognekraft.
– Eg skal ikkje seie vi har hundre prosent gardert oss, men vi har gjort ein skikkeleg innsats for å sikre dei mest utsette traseane, seier Stadheim.
Men som Asgeir Aase i SFE seier det, det er uunngåeleg med straumbrot når naturkreftene tek sats.
– Vi kan ikkje byggje oss ut av eit så ekstremt uvêr.