NRK Meny
Normal

Beslagla narko for store summar i stor aksjon i Førde

FØRDE (NRK): Politiet har arrestert det dei meiner er hovudmannen i ein narkoliga i Sunnfjord. Under aksjonen fann dei narkotika og doping med ein gateverdi på fleire hundre tusen.

Dag Fiske, lensmann i Førde

GJEKK TIL AKSJON: Regionlensmann Dag Fiske er glad for at dei no har avdekka det dei meiner er eit omfattande narkomiljø i Førde.

Foto: Anders Tesdal Galtung / NRK

– Natt til fredag så hadde vi ei pågriping her i Førde der vi gjorde eit av dei største narkobeslaga som er gjort i Sogn og Fjordane, seier regionlensmann Dag Fiske til NRK.

Han syner fram bileta av det som er eit av dei største narkobeslaga i Sogn og Fjordane på svært lenge. Bileta syner nær eit kilo amfetamin, store mengder anabole steroid, MDMA-pulver og hasj. MDMA-pulver er råstoffet i det som vanlegvis blir kalla ecstasy.

Tre studentar

– Vi hadde ein aksjon mot eit miljø for tre veker sidan og gjennom den aksjonen så har det kome fram ytterlegare opplysningar. Med det som bakgrunn og i tett samarbeid med UP-etterretning gjekk vi til aksjon natt til fredag og arresterte tre personar, seier Fiske.

Dei tre som blei arresterte i aksjonen natt til fredag er studentar ved Høgskulen i Sogn og Fjordane i Førde, men kjem opphavleg frå andre stadar i landet.

– Det vi ser på som hovudmannen i saka har innrømma at han kjenner til stoffet. Han er også fengsla. Alle dei arresterte er i 20-åra, opplyser regionlensmannen.

Dopingbeslag i Førde

DOPING: I aksjonen fann politiet også ei større mengd med anabole steroid.

Foto: Politiet

Samarbeid med UP

Nyleg blei ein mann frå Sunnfjord fengsla i den same saka. Etter det NRK veit, så har fleire av dei arresterte i den siste aksjonen lagt korta på bordet. Med den siste aksjonen er over ti personar arresterte og sikta for anten bruk, oppbevaring eller sal av ulike former for narkotika.

– Vi sat med opplysningar som vi har følgd opp. Så er det godt jobba frå UP-etterretning som har kjennskap til miljøet og som har følgd opp enkeltpersonar. Dette er eit stort beslag i vår målestokk og det er så stort at det verkar til å vere rekna for ein større marknad enn Førde, meiner Fiske.

beslag av amfetamin i førde

AMFETAMIN: I aksjonen fann politiet nær ein kilo amfetamin. Dette er eit av dei største amfetaminbeslaga i Sogn og Fjordane nokon gong.

Foto: Politiet

Uroa over utviklinga

Han opplyser at dei ikkje ventar fleire pågripingar i denne saka no, og politiet meiner at dei har klart å ta ut bakmennene i eit miljø som omfattar mellom 15 og 20 personar.

– Dette er urovekkande med tanke på omfanget av beslaget. Det ser framleis ut for at det er i eit relativt avgrensa miljø. Men det ser ut for at MDMA har etablert seg, og det er vi uroa over, slår han Fiske fast.

Politiet i Sunnfjord har dei siste vekene også avdekka andre brukarmiljø i Sunnfjord. Mellom anna i Florø, der ein mann blei pågripen og fengsla, mistenkt for kjøp og sal av amfetamin.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.