- Tilbakegang i opplaget er aldri noko kjekt. Det vi må ta med oss, er at vi står veldig sterkt i Førde og nærområda - der har vi framgang, seier Yngve Årdal.
Han er redaksjonssjef i avisa Firda, og konstaterer at avisa hans gjekk tilbake med 255 aviser i opplag i 2010. Det er desidert mest av lokalavisene i Sogn og Fjordane.
Auka med 51 aviser i opplag
- Tilbakegangen vår kjem i område der vi har konkurranse frå andre lokalaviser, det vil seie Gloppen, Flora og Høyanger. Dessutan har vi stor nedgang i abonnentar utanfor fylket, forklarer Årdal.
Han er ikkje åleine om å vere leiar i ei avis som slit i motbakke om dagen. Av alle avisene i fylket var det berre Ytre Sogn som kunne vise til opplagsauke, då avistala vart lagt fram i dag.
Høyanger-avisa auka i 2010 opplaget sitt med 51 aviser for kvar utgåve.
- Det er eit resultat vi seier oss nøgde med. Vi hadde nedgang i fjor, så vi hadde eit sterkt håp om å gå opp att i år, seier konstituert redaktør Vegard Volle.
- Men at vi er den einaste avisa som går opp, er noko overraskande, legg han til.
Her er utviklinga i opplagstal for 2010:
- Firda 13330 (-255)
- Firda Tidend 3046 (-18)
- Firdaposten 5327 (-130)
- Fjordabladet 2796 (-1)
- Fjordenes Tidende 5308 (-126)
- Fjordingen 4269 (-30)
- Sogn Avis 10053 (-108)
- Ytre Sogn Avis 1647 (+51)
- Eg trur avisene som skriv heilt ultralokalt om sine kommunar har ei framtid. Firda skal femne litt breitt, og då blir det litt meir regionale saker. Husstandar som vel å ha anten ei eller to aviser, vel dei kanskje bort den regionale, seier Yngve Årdal.