Berga 70 vogntog på to døgn

Nær 70 bergingsoppdrag er fasiten for bilbergaren i Førde etter to kaotiske dagar på vintervegane i fylket.

• LES OGSÅ: Plutseleg forsvann søppelbilen i ei snøsky

– Vi hadde 38 oppdrag i går, og døgnet før bikka vi 30 der også. I dag har vi åtte oppdrag, så då er vi straks på kring 80 oppdrag i løpet av tre døgn, summerer opp dagleg leiar Arild Tistel.

Hyra inn ekstra

– Vi sove på skift. Det er slikt vi må gjere når det er full fart, legg han til.

• SJÅ: Oppdaterte vegmeldingar hos NRK Trafikk

Tistel er ute på nytt oppdrag når NRK ringer. Og under telefonsamtalen dukkar det opp nye oppdrag, men det skal godt gjerast å hamne på same nivå som torsdag og fredag. Då var det ekstremt mykje å hengje fingrane i. Store køyretøy låg som strøydde langs vegane.

• LES OGSÅ: Her hamna ambulansen med pasient

Tistel har to store og fem små bergingsbilar i bilparken. Han har fem tilsette, men når tilhøva er så ekstreme som no, har han kalla inn ekstrabemanning.

Jamt fordelt

– Vi har vel hatt døgn med like mange oppdrag, men då er det gjerne tale om kuldeperiodar der fleire har startvanskar. Det blir raske oppdrag, seier han.

• LES OGSÅ: – Han la ikkje på kjettingar. No står han her

– No har det vore 80 prosent med utforkøyring eller fastkøyring. Og mange større køyretøy, held Tistel fram.

– Er det hovudsakleg utanlandske eller norske vogntog?

– No har det vore jamt fordelt.

Smale vegar

Hos Vang Auto-Service seier også Rune Vangensten at dei har oppdraga nokolunde jamt fordelt mellom utanlandske og norske vogntog. Han legg til at også mange norske vogntog har utanlandske førarar.

Vangensten er usikker på kor mange dei har måtte hjelpe på fjellovergangane i Indre Sogn, men stadfestar at det har vore hektisk.

– Vi har vel køyrt tre-fire tungbergarar kontinuerleg i tre-fire døgn no. Dette skjer alltid når det kjem snø. Det har vore ekstremt glatte dagar, seier han og fortel at han har sett godt skodde trailerar stå i grøftene.

– Det er ulike årsaker til at det går gale. Personleg trur eg smale vegar har ein del å seie i vårt område, legg Vangensten til.

– Har gått i eitt

Hektisk har det også vore for Jan Bernhoft hos Jans Bilberging i Stryn. Han har ikkje tal på kor mange oppdrag han har hatt.

• SJÅ: Oppdatert vêrmelding frå yr.no

– Det er vel lettare å telje kor mange timar eg har vore heime. Det starta i 12-tida onsdag og sidan har det gått i eitt bankande køyr, med nokre få timar i slengen på puta, seier han og meiner likevel at han har hatt meir hektiske dagar.

– Men du blir ikkje så veldig observant når du nærmar deg 24 timar i strekk utan å sove eller ete, seier han.

– Onsdag var verst

Bernhoft trekkjer fram Hjelledalen – Strynefjellet som den verste strekkja i hans område. Spesielt dårleg var det onsdag.

• SJÅ: Slik ser det ut på vegane no (webkamera)

– Eg har ikkje vore med på slikt vêr før. Eg såg knapt handa mi, seier han. På eitt tidspunkt stod det fem bilar i bakkane opp mot Strynefjellet.

– Brøytebilen køyrde sikksakk mellom bilane. Det var kaotisk. Då var det berre å byrje i ein ende og ta den første og beste som hindrar trafikken, seier Bernhoft.

Gode råd frå Piel

Georg Piel på Stårheim fortel om hektiske dagar og fleire møte med dårleg skodde køyretøy.

– Har ein ikkje greie på dekk, så må ein spørje folk som har greie på det. Ein annan ting er at folk først no, som snøen kjem, legg på vinterdekk. Men dekk er som mjølk og brød. Det er datovare. Når eit dekk ligg ein halv sesong, så blir det skorpe på som må slitast av før snøen kjem, seier han og rår alle bilistar om å køyre varsamt på dei glatte vegane.

– Tenk på dykk sjølve. Hald farten nede og køyr forsiktig så de kjem dykk trygt fram. Det er snart jul og vi vil ha dykk alle saman.