Straumen har vore vekke det siste døgnet i Naustedalen og Angedalen, og alt tilgjengeleg mannskap frå Sunnfjord Energi har vore ute og jobba i terrenget ei rekkje stader. Straumen skal no vere tilbake hjå alle kundane, og Sunnfjord Energi ber dei som ikkje har det om å sjekke jordfeilbrytaren.
– Vi beklagar sterkt at folk har vore utan straum i nesten eit døgn. Vi gjer så godt vi kan, men det er ein veldig spesiell situasjon no med mykje is på linjene. Det er spesielt inst i Angedalen og opp i Naustedalen vi slit med dette. Dette fører til knekte stolpar, og andre skader på linjene våre, seier Olav Osvoll, stasjonssjef i Sunnfjord Energi, til NRK.
Les også:
Les også:
Han peikar på at det er sjeldan at vêrtilhøva er så vanskelege som no, og dei gjer alt i si makt for å få straumen attende.
– Dette er eit fenomen som oppstår år om anna. No er det lenge sida sist vi har hatt denne typen problem som vi har nett no. Vi har flydd over linjene med helikopter i dag og fått lokalisert dei feila vi såg frå lufta. Men det har også oppstått nye feil, så det er ein veldig stor belastning, særleg i desse to dalane, slår Osvold fast.