Beate og Mona klinka til med sølv og bronse i kettlebell-VM

– Etter konkurransen har eg sikkert teke bilete saman med hundrevis av russarar, flirer Støfring frå Jølster.

Ho er ei av tre sunnfjordjenter som denne helga har konkurrert på VM i kettlebell i Seoul i Sør-Korea. Og for Støfring vart det nesten full klaff.

24-åringen løfta i proffklassen der dei pressar to kettlebells på 24 kilo over hovudet. I løpet av dei ti minuttane konkurransen varte klarte ho å gjere dette 63 gonger.

Det er ein gong mindre enn eigen personlege rekord, noko som vart akkurat ein repetisjon for lite til å ta gullet. Amerikanske Kimberly Fox vart nemleg verdsmeister på 64 repetisjonar. Støfring var lettare enn Fox i kroppsvekt, og kunne teke gullet om ho hadde fått opp ein til repetisjon.

Kettlebell-sporten kjem opphavleg frå Russland, og dei eldre veteranane let seg imponere av dei norske jentene.

– Eg er utruleg godt fornøgd. Det er veldig strenge dommarar her, så eg måtte vere veldig fokusert på teknikk, seier Støfring.

• Les også: For to år sidan sette Beate verdsrekord i den tøffaste øvinga i kettlebell

Kunne ikkje slurve ein einaste repetisjon

Kettlebell er ein krevjande idrett, som krev både styrke og uthald. Og ikkje minst sterk psyke for å klare ti minuttar med smerte.

Støfring har drive med kettlebells i tre år og hadde før VM i Korea mål om å sette ny verdsrekord. For å klare det måtte ho ha klart 67 repetisjonar. I dag stogga det på 63.

– Det er forskjellige ting som spelar inn på konkurransen i dag. Eg bur til vanleg i Australia og er van med å trene på morgonane, medan vi no løfta på kvelden. I tillegg var det veldig strenge dommarar. Så eg er veldig fornøgd. Eg måtte ha gode repetisjonar og god teknikk, og fekk ingen underkjente repetisjonar, seier Støfring.

• Les også: Førde-jente sjokkerte alle med VM-gull
• Les også: Her trur Beate at ho har tangert verdsrekorden

Bronse til Førde-jente

I tillegg til Støfring løfta også Mona Brede Aase i proffklassen 2x24 kilo long cycle (ti minutt konkurransetid). Ho klarte 52 repetisjonar, som var ny personleg rekord. Støfring er trenaren til venninna og er imponert.

– Det var ein veldig sterk prestasjon. Dei andre damene låg på rundt 30 og 40 repetisjonar, så ho dominerte enkelt.

Trine Ryland løfta i amatørklassen med 2x16 kilo long cycle. Ho fekk ein sjuandeplass med 72 repetisjonar. Det gjekk ikkje heilt etter planen, men likevel:

– Eg som trenaren hennar er veldig godt nøgd. Ho har ein personleg rekord på 72, og med såpass sterkt nivå i klassen var det veldig bra, seier Støfring.

– No skal vi ta ei øl og feire at vi er ferdige.