Barne-TV-serien Klart eg kan var eit naturleg val då Den norske dokumentarfilmfestivalen (Dokfilm) i Volda skulle syne fram filmar for born denne helga. Episoden om 6 år gamle Lukas som trenar ballett falt i god smak.
- LES OGSÅ:
Dokfilm er ein av dei fremste dokumentarfestivalane i landet, og har mellom anna eit eige barne-program. Her får barn og vaksne sjå filmar som er tilpassa eit ungt publikum.
– Lukas vart teken i mot litt som ei filmstjerne blant borna. Dei hadde mange spørsmål til han om korleis det var å bli filma, og om hobbyane hans.
Det fortel prosjektleiar for TV-serien i NRK, Stian Sjursen Takle. Han deltok på festivalen saman med Lukas for å fortelje om korleis serien blir til.
Populær serie
Programskapar Eva Westvik har hausta mykje hyllest for både denne og tidlegare TV-seriar.
Publikum likte det dei såg, fortel Sjursen Takle.
Stolte og glade
– Det var fleire, både born og vaksne, som retta opp handa berre for å seie at dei likte filmen. Det var veldig kjekt. Vi er veldig stolte av Klart eg kan. Og set stor pris på at publikum likar det.
Programansvarleg for festivalen, Thorvald Nilsen, fortel at Klart eg kan vart plukka ut blant ei rekkje andre kandidatar.
– Vi valte denne filmen fordi vi likte den svært godt. Både filmen og Lukas var sjarmerande. Forteljinga var gjort på ei fin måte, som gjorde at vi kom tett på Lukas.
– Eg spurte etter filmen om publikum hadde likt den. Og det fekk eg eit unisont ”ja” på. Og så var det ein ekstra bonus at hovudpersonen sjølv var i salen. Publikum var veldig begeistra over det.
- Du kan sjå episoden med Lukas i NRK sitt nye nett-TV.