Heller handballskule enn haustferie

Å sove lenge og slappe heilt av kan ofte vere freistande når ein har haustferie og skulefri.

I Førdehallen vrimlar det av ungar som let ferie vere ferie. Dei 39 ungane som er samla til dyst vil heller gå på handballskule enn å ha heilt fri.

• SJÅ VIDEO ØVST I SAKA!

Før skuledagen kan starte, er det tid for opprop. Instruktørane har nok med å halde ro på ein gjeng viltre ungar som helst berre vil setje i gang og springe ut på bana.

Ungane er mellom 6 og 12 år og frå forskjellige stader i fylket. Alle er samla med eitt mål for auge: Å bli betre i handball.

Men her er det ikkje alvor og konkurranseinstinkt som er viktigast på vegen mot målet. Det er også viktig å ha det kjekt og bli kjent med dei andre ungane på handballskulen.

• LES OGSÅ: Her lærer dei Liverpool-måten å spele på

– Mykje betre enn å sitje heime

Vilje Sande på ni år er ein av dei mange ungane som spring energisk rundt på handballbana. Til vanleg spelar ho handball heime i Dale i Sunnfjord, og har spelt handball i eit par år allereie.

Den unge handballspelaren syntest det var meir freistande å bruke ferien på å springe rundt og kaste ball enn å ha fri.

Vilje synst at det beste med handballskulen er at ho får vere i aktivitet. Ho har ikkje vore med på handballskulen i Førde før, men seier det freistar til gjentaking:

– Handballskulen er veldig gøy, så eg vil prøve det ein gong til!

• SJÅ OGSÅ: NRK Super - Superkviss - håndball

Kjekt å treffe nye vener

Ei jente i rosa skjorte står i mål når det er straffekonkurranse. Keeperen er Maika Jørgensen på tolv år, som elskar å spele handball.

Difor var handballskulen midt i blinken for ho.

Ho seier at handballskulen er ein flott plass for å møte nye folk samtidig som ein held seg i aktivitet og har det gøy.

Maika har spelt handball i to år, og er dermed ikkje nokon nybegynnar i sporten.

I løpet av dei tre dagane har ho vist fram skotarma si fleire gongar, noko som har resultert i fleire mål.

– Det er veldig gøy å score mål, og eg blir veldig glad av det, seier tolvåringen.

– Vi veit jo heile tida at vi tapar ...

Mange av ungane i Førdehallen har aldri vore på handballskulen før, sjølv om den har blitt arrangert fleire gongar dei siste åra. Ein av dei som har vore med før, er Sivert Høyvik på sju år.

Han synst det er kjekt å få leike leikar, og liker spesielt flaggleiken.

Sivert liker også å spele handballkamp, men innrømmer at det av og til kan vere vanskeleg å spele kampar mot dei eldste ungane.

Han gir likevel alt han har når han kjem ut på bana, uansett om motspelarane er større eller eldre enn han sjølv.

Ein av tinga ungane lærer på handballskulen, er at det er viktig å vere kompis på bana. Derfor er det ikkje nokon øyredøyvande jubel å høyre når ballen går i nettet.

Har gode tips til det andre laget

Vilje meiner ein skal vere glad når ein scorar mål, men at det ikkje er bra å bli sint på keeperen.

– Så da viser vi det ikkje så masse, sånn, "jess, vi vant!", seier Vilje.

Ho har også mange gode tips til kva ein heller kan seie til motspelarane:

– Bra jobba, godt gjort, dokker jobba bra, men vi vann!

• SJÅ OGSÅ: Vinn eller forsvinn