Forsvarskjempa likar det han ser - men åtvarar mot å ta «heilt av»

Forsvarskjempa var laurdag blant vel 500 tilskodarar som følgde treningskampen mot Brann frå tribunen.

I sin nye formasjon, og i sin første kamp etter salet av Malick Mane , vann Sogndal 1–0 etter Ørjan Hopen si straffescoring. Sjølv om det ser bra ut, åtvarar eidaren mot å ta «heilt av» etter ei rekkje sterke resultat i oppkøyringa.

• LES OGSÅ: Nykomlingen viste seg fram

– Det har fungert bra i oppkøyringa, så får vi håpe det fungerer like bra i serien. Det er der det gjeld, men det ser bra ut. Vi gler oss, seier Azar Karadas.

Nøgd Valsvik

Sogndal har gått frå sin vande 4-4-2-formasjon, til ein 3-5-2-formasjon. Til no har eliteserielaget gått sju kampar på rad utan tap. Brann har to gonger måtte bite i det sure eplet. Også Start og Aalesund har blitt slått med den nye formasjonen.

• SJÅ: Hopen si straffescoring mot Brann

Gustav Valsvik meinte laurdag at den nye formasjonen gir einskilde fordelar. Til helga kjem Hødd til Fosshaugane for årets generalprøve.

– I staden for å ha fire spelarar bak, så er vi tre. Det kan også vere fem bak, men vi får to breie kantar i spel heile tida og tre sentralt, noko som gir god blokk, i tillegg til tre spissar, sa Valsvik.

– Ein fin siger

Også Karadas meiner formasjonen passer Sogndal bra. Sjølv om den ikkje fungerte optimalt i 90 minuttar mot Brann.

– Det var spennande, men eg tykkjer første omgang var midt på treet. Vi heva oss i andre omgang, og dette er ein fin siger å ta med oss, seier Karadas.

– No har de slått Brann to gonger i år. Blir det eit lite tronskiftet på Vestlandet i år?

– Brann kjem alltid til å vere største klubben på Vestlandet, men vi har hatt ei god oppkøyring og mykje av det vi jobbar med på trening ser vi att i kamp. Det kan bli ein spennande sesong.

– Vanskeleg lag

Erik Huseklepp vedgjekk at Sogndal har vore eit vanskeleg lag å møte. Spesielt etter at dei la om til det nye systemet. Brann fekk det heller ikkje til i treningskampen på Fosshaugane.

Laget hadde ballen mest før kvilen, men det vart for omstendeleg. Dei spelte mykje på tvers og kom seg ikkje til mange sjansar.

– Sogndal er eit vanskeleg lag å møte, dei ligg med fem mann bak nesten til ei kvar tid. Det er utfordring for oss, seier Huseklepp.

– Kva tykkjer du er skilnaden på å møte Sogndal i år, kontra i fjor?

– Eg har ikkje sett dei så mykje, men dei ligg like lågt som i fjor. Kanskje til og med lågare. Dei har lagt opp til fem bak, i staden for fire. Det er tøft.