– Det kostar ein del med eit julebord. Etter ei samla vurdering har vi funne ut at vi ikkje kan prioritere å bruke pengar på det, seier Reni Herland til NRK.
Ho er personalleiar i den hardt pressa kommunen.
Tøft økonomisk år
For det har vore eit tøft økonomisk år for Lærdal. Kommunen har mellom anna vore nøydde til å seie opp tilsette. I tillegg fekk ikkje dei som no er 10.-klassingar ved Lærdalsøyri skule støtte til den årlege fotturen til Jotunheimen.
Herland seier at det også ligg ein symboleffekt i avlysinga av julebordet.
– I tunge økonomiske tider, og i eit år der vi måtte gå til nedbemanning, meiner vi det ikkje er rett å bruke pengar på julebord, seier personalleiaren.
Storbrannen i januar har vore med å leggje ytterlegare press på kommuneøkonomien. Men Lærdal var allereie før brannen på ROBEK-lista over kommunar som slit økonomisk.
- LES OGSÅ: Ber om 50 millionar kroner
- LES OGSÅ: Håpar på pengar frå kommunalministeren
- LES OGSÅ: Håpa på pengar – fekk berre skryt
– Trist at vi ikkje arrangerer
Kommunen har rundt 290 tilsette, noko som gjer julebordet til eit av dei største i Lærdal. Sjølv om ikkje alle møter på julebord, vil det koste mykje pengar, seier Herland.
– Det vil koste mellom 600 og 800 kroner per person.
Avgjerda om å avlyse julebordet er teke av administrasjonen, og skal ikkje handsamast politisk i kommunestyret.
– Kunne ikkje ein fest vere med å betre stemninga og moralen blant tilsette i ein vanskeleg situasjon for kommunen?
– Det er trist at vi ikkje arrangerer julebord akkurat no. Mange har gjort, og gjer framleis, ein kjempeinnsats dette året. Men likevel: totalt sett tenkjer vi det vanskeleg å forsvare å bruke pengar på eit julebord når økonomien er slik han er, seier Herland.
Kommunen vil prøve å få til eit julebord neste år.