NRK Meny
Normal

Arne Scheie trur Florø kan nå eliteserien

– Eg er veldig imponert. Det er få eksempel på ein slik klatreoperasjon som Florø har gjort. Det er spennande å sjå når dei tek steget opp til dei aller beste.

Arne Scheie

FØLGT FLORØ: Arne Scheie er svært interessert i fotball og likar å følgje med på det som skjer i dei fire øvste divisjonane. – Då eg for nokre år sidan leste ein reportasje om dette Florø-laget med mange unge spelarar som kjempa om å komme med på aldersfastlagde landslag, tenkte eg i mitt stille sinn at det kunne komme eit topplag også frå Florø i framtida, seier han.

Foto: Varfjell, Fredrik / NTB scanpix

Det seier pensjonert NRK-journalist, og «fotballeksikonet», Arne Scheie.

På ti år har Florø Fotball gått frå 4. divisjon til 1. divisjon.

– Det som slår meg først, er Strømsgodset som på relativt kort tid gjekk frå 4. divisjon til dåverande 1. divisjon på 1960-talet. Strømsgodset var i ein liknande situasjon, med mange lokale spelarar, seier Scheie.

– Veldig uvanleg

Scheie har følgt Florø-fotballen siste åra og er imponert over utviklinga. At dei med spelarar hovudsakleg fødde i 1994-1996 no er klare for 1. divisjon, meiner han er ei bragd av dei sjeldne. I 1976 starta Sogndal sitt liv på toppnivå med cupfinale og opprykk frå 2. divisjon.

Ville jubelscener

FOR SJELDAN: Arne Scheie meiner det var ei bragd utanom det vanlege som skjedde på Florø stadion i helga. – Det er mykje snakk om pengar og sjølv i store byar klarer dei ikkje dette. Berre sjå på Oslo by som neste år kan oppleve å ikkje ha lag i Tippeligaen – og heller ikkje lag i 1. divisjon, utanom eventuelt Vålerenga, seier han.

Foto: Oddleif Løset / NRK

Spelarane er lokale, laget er ungt og budsjettet i klubben er langt frå det største i norsk fotball. Det er heller ikkje byen.

– Det er veldig uvanleg og morosamt. I Norge, og generelt i fotballen i Europa, er det diverre lag frå dei større byane som går opp og markerer seg. Det at Florø har klart det, fortel i klartekst at dei har jobba rett og gjort veldig, veldig mange gode ting, seier han.

Trur på eliteserien

Endre Kupen

LOKAL: Endre Kupen er ein av mange spelarar frå Sogn og Fjordane på Florø-laget. – Det betyr veldig, veldig mykje med lokale spelarar. Sjølv hos kjøpelag er dette med «the local boy», som dei seier i England veldig viktig. Dette har eg tru på, om dei klarer å halde den same linja framover, seier Arne Scheie.

Foto: TRULS KLEIVEN / NRK

Etter at opprykket var sikra, spøkte toppscorar Endre Kupen med at laget no ville surfe gjennom 1. divisjon og rett opp i Eliteserien. Og trena Terje Rognsø var tydeleg på at ambisjonane på sik er høgare enn å halde plassen. Scheie trur eliteseriespel kan vere meir enn eit luftslott.

– Alt er realistisk i fotball. Hadde du spurt folk i Florø om 1. divisjonsspel medan dei kava i 4. divisjon, så ville dei vore skeptiske. No er dei der, og då er moglegheitene så til dei grader der om ein driv rett, trur på eigne eigenskapar og det ein står for.

– Kva er det Florø har som gjer dei eigna til å ta eit nytt steg?

– Florø har mange lovande unge gutar, som sikkert vil utvikle seg endå meir. Byggjer ein vidare på det suverene som har skjedd i 2. divisjon i år, så kan det halde fram i 1. divisjon.

Halde fram

– 2018 kjem nok for tidleg, men held dei på og held fram å utvikle spelarane, har det fine miljøet og kameratskapen, kanskje det blir eit nytt eventyr om nokre år, seier Scheie.

Men i første omgang handlar det om å berge plassen i 1. divisjon. I dag slit sjølv etablerte klubbar som Bryne, Fredrikstad og Hødd med unngå nedrykk.

– Ein må halde på den gode treningskulturen og vere audmjuk til oppgåva. Det er noko av det viktigaste, seier Scheie.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.