Vik har mista mange spelarar sidan nedrykket frå 3. divisjon i fjor. I Årdal fekk dei ein svært tung dag på grasmatta.
Etter 3–0 ved pause, vart det reine målfesten med ti mål i andre omgang. Åtte av desse til heimelaget.
– Det var stor skilnad på laga i dag, men så spelte vi skikkeleg godt. Vi hadde ein god dag. Samstundes møtte vi eit svekka Vik-lag frå i fjor, seier femmålsscorar Preben Strypet.
30 sjansar
Det tok kvarteret før den første ballen låg i nettmaskene. Deretter kom måla på rekkje og rad. Til slutt skilde det ni mål mellom dei to laga.
– Etter 3–0 til pause, så fell ein ofte litt nedpå når ein har så god kontroll. Det gjorde ikkje vi. Vi bestemte oss i pausen om å halde trykket oppe og la ballen gå fort i lengderetninga, fortel Strypet og meiner sigeren burde vore større.
– Vi kom til nærare 30 sjansar. Vi brende ein del store sjansar i første omgang, seier han.
– Kva ambisjonar har de for cupen i år?
– Ambisjonen må jo absolutt vere å komme til første runde, og gjerne få kamp mot Sogndal.
Lange reiser
Årdal har i sesongoppkøyringa slått Sogndal 2 og Fjøra, medan oppgjera mot Fana og Valdres enda i tap. Laget er stort sett det same som i fjor. Då var laget ungt.
I år spelar ikkje 3. divisjonslaga frå Sogn og Fjordane lenger med lag frå Hordaland. Med motstandarar frå Møre og Romsdal blir det dermed mange lange turar for Årdal.
– Vi veit lite om sunnmørslaga, men bør kunne sikte oss inn på ei plassering midt på treet, avsluttar han.
Andre resultat:
- Stryn - Tornado Måløy 7-1 (3-1)
- Larsnes/Gursken - Eid 3-2 (1-0)
Førde, Florø og Sogndal kjem inn i seinare rundar.