- Eg veit ikkje korleis eg skal klare meg økonomisk, seier Kjell Nylund.
Han var ein av dei 320 som mista jobben då Fundo Wheels i Høyanger gjekk konkurs i januar. Då han skulle melde seg arbeidslaus hos NAV vart han sjokkert:
- Eg fekk beskjed om at eg ikkje har krav på dagpengar fordi eg studerer.
Fekk beskjed om å avslutte studiet
Dei siste to åra har Nylund tatt fag ved Universitetet i Bergen på deltid. Studiet er ferdig i juni. Fram til då får han ikkje arbeidsløysetrygd frå NAV.
- På NAV la dei fram eit skjema der eg måtte skrive under på om eg var villig til å avslutte utdanninga, seier Nylund.
Det er heilt uaktuelt:
- Eg vil ikkje avslutte noko eg har studert i to år, eg kan jo få ein betre jobb når eg har gjennomført studiet.
- Strengt regelverk
Direktør Tore Thorsnes i NAV Sogn og Fjordane seier det er mykje som skal til for at studentar skal få dagpengar.
- Men denne saka skal vi sjå på på nytt, seier Thorsnes.