Arbeidet med ny bru er i gang

Dei første vekene kjem ikkje folk til å sjå så store endringar, seier prosjektleiar Gunnar Solbakken i Statens vegvesen.

– No er vi endeleg i gang, det første som skal gjerast komande veke er å ta nokre prøver i fjorden for å kartlegge kvaliteten på sjøvatnet som skal brukast i samband med fyllingsarbeidet som skal skje som første aktivitet.

Fyllingsarbeidet skal pågå fram til 1. mai.

– Då må vi stoppe på grunn av laksevandringa i mai/juni. Vi håpar at vi er komne langt med fyllinga til den tid. I mars vil vi vere i gang med førebuande peling, som er grunnlaget for fundamenta som skal stå ute i fjorden.

Det har vore ein del hindringar og forseinkingar i arbeidet med planlegging og finansiering, men i mai i 2015 vart det til slutt gitt klarsignal.

• Les også: Bygging av Loftesnesbrua i Sogndal er utsett i eitt år til
• Les også: Jubel i Sogndal: Arbeidet med ny Loftesnesbru vert starta i haust
• Les også: Sju entreprenørselskap vil byggje Loftesnesbrui

I bruk før jul 2017

Arbeidet vil i første omgang ikkje vere til hinder for trafikken på riksveg 5 over gamlebrua, men etter kvart som aktiviteten aukar vil folk merke det.

– Særleg når vi tek til med rundkøyringa på Sogndal-sida vil det merkast, men vi skal prøve å legge til rette så godt vi kan, slik at trafikken går mest mogeleg smertefritt, seier Solbakken.

Mot slutten av november 2017 skal det gå an å køyre over nyebrua.så skal gamlebrua rivast. Heile prosjektet skal vere ferdig sommaren 2018.

Statens vegvesen har oppretta ei eiga Facebook-side, der folk kan fylgje arbeidet med brua: Loftesnesbrui, Statens vegvesen.