Ap: – Senterpartiet er eit nei-til-alt-parti

– Senterpartiet er eit nei-parti til alt. På mi vakt skal ikkje Arbeidarpartiet vere eit nei-parti. Vi skal vere framtidsretta og endringsvillege.

Det sa fylkesleiar Hilmar Høl til dei om lag 150 frammøtte på fylkesårsmøtet på Scandic Sunnfjord Hotel i Førde.

I ei årrekkje har Arbeidarpartiet og Senterpartiet samarbeida på fylkestinget. Fylkesordførarkjeda har dei bytta fram og tilbake mellom seg i over 20 år. Men no verkar det som idyllen slår sprekkar.

– Vårt parti skal ikkje vere ein del av vil-ikkje-fylket-folden, sa Hilmar Høl til applaus frå salen.

Det einaste partiet han nemnde i si opningstale var samarbeidspartnaren Senterpartiet. Og det var ikkje rosande ord han kom med. I kommunereforma meiner han Sp er eit reint nei-parti.

– Eg er stolt over vårt standpunkt i kommunereforma. Vi ønskjer ei frivillig linje. Ikkje den tvangen som regjeringa brukar.

Valet

På partiet sitt første årsmøte etter kommune- og fylkestingsvalet i haust, var det tid for sjølvransaking. Der måtte dei erkjenne at Sp vart største parti i fylkestinget, og jamstore i kommunevalet.

– Vi tapte fylkestingsvalet. Og det var ikkje akkurat hårfint. At vi tapte så mange bastionar i Sogn er skuffande. Og i Bremanger vart Ap stukken i ryggen i siste minutt.

Han understreka at han var glad for dei ordførarane som vart valte.

Fleire kjenner seg att

Åshild Kjelsnes har hatt eit tett samarbeid med Sp i fylkestinget. Først som varaordførar under fylkesordførar Nils R. Sandal, som fylkesordførar for varaordførar Jenny Følling, og no sist som vara under den same Følling.

– Det er vel fleire som kjenner att den skildringa om at Sp seier nei til alt. Ap har aldri vore redd for endringar, sa Kjelsnes til NRK etter talen.

– Å setje seg på sidelinja og seie at alt skal vere som det har vore, er jo ikkje framtidsretta. Eg opplever at Senterpartiet i større grad er der.

Også tidlegare fylkesvaraordførar og stortingspolitikar Tor Bremer trekte fram Sp i eit innlegg:

– Vi må vere eit tydeleg alternativ til Senterpartiet. Vi må vere samfunnskritiske, og ikkje forsvarar av at ting skal vere som dei alltid har vore, sa Bremer til sine partifellar.