Førde kommune godtek ikkje 34-dobling av prisen - ankar til Høgsterett

Kommunen tok over eigedommen til Jon Flom for å byggje Hafstad idrettspark og betalte 500.000 kroner for arealet.

Men saka hamna i retten. Gulating lagmannsrett meinte Flom skulle ha 17 millionar kroner. Dermed blir totalsummen for parken tre gonger høgare enn budsjettert.

– Stort sprik

Førde-rådmann Ole John Østenstad seier saka er prinsipiell.

– Det eine er at det er veldig stort sprik mellom verdivurderingane til tingretten og lagmannsretten. Men det er først og fremst det at vi meiner lagmannsretten har teke feil i korleis ein skal vurdere slike saker.

– Kva utslag vil det gje på kommuneøkonomien dersom de må ut med 17 millionar kroner?

– Det er det for tidleg å gå inn på. Men det vil nok føre til at tiltak som ligg i økonomiplanen må utsettast.

Rådmann Østenstad er svært spent på om Høgsterett vil behandle saka.

– Her er det ei gråsone som gjer at alle norske kommunar er sette i ein situasjon der dei ikkje veit kva verdi dei må legge inn i budsjetta sine ved utbygging av friområde. Difor håpar og trur eg at Høgsterett tek inn og behandlar saka.

• LES OGSÅ: I heile fylket jubla dei over snøfrie baner
• LES OGSÅ: Har fått ein siste sjanse til å fullføre arbeidet - stod klare då finvêret kom
• LES OGSÅ: Dei treng to dagar med opplett