Onsdag starta andre runde med rettssaker etter aksjonane mot dumping av gruveavfall i Vevring i Naustdal.
– Eg har aldri vore i tvil om at det var nødvendig for å få dette prosjektet opp i dage. Eg står framleis for at dette var ei riktig avgjerd, seier aksjonist og tiltalt, Magnus Storvoll Strømseth.
Påtalemakta er langt frå samd med tiltalte om at dei hadde prøvd alt for å stogge planane.
– Dei tiltalte er medlemmar i Natur og ungdom. Det er merkeleg at dei ikkje har prøvd å samle saman midlar til å prøve Stortinget sitt vedtak i retten, seier Malin Skeibrok Ånesen, som er aktor i saka.
Møtte utan forsvarar
Nesten ingen av aksjonistane har godteke bota dei har fått av politiet. Det betyr at kvar enkelt sak må opp i retten, noko som skjer på fellesskapet si rekning. På onsdag møtte tre av dei tiltalte aksjonistane utan forsvarar.
– Det var både krevjande og spanande. Eg er berre tilsett i ei 50 prosent stilling, så forsvarar har eg ikkje råd til, seier Storvoll Strømseth.
Likevel var aksjonisten nøgd med dagen i retten. Tiltalte argumenterte for at ny forsking på liknande prosjekt viser at gruvedumping har større konsekvensar enn kva forskarane hadde trudd, og at Nordic Mining no er meld til politiet for å bruk firehjulingar som dei ikkje hadde søkt om løyve til.
– Eg trur vi fekk fram nye moment i denne saka som ikkje er snakka om før, så eg er nøgd med at eg klarte å argumentere for dette, seier han.
- Les også:
- Les også: