Eit samrøystes formannskap i Naustdal ber kommunestyrepolitikarane røyste ja til ein storkommune med Førde, Gaular og Jølster. Vedtaket er i tråd med ynskje til innbyggjarane i kommunen og skjedde samstundes som kommunestyret i Jølster gjorde same vedtak i går. Både Gaular og Naustdal skal handsame saka i kommunestyret høvesvis 28. og 30. juni.
Kommunestyret i Gloppen har i ettermiddag sagt nei til samanslåing med Eid. Dermed følgjer dei rådet frå folkerøystinga, der eit knapt fleirtal sa nei til samanslåing 30. mai. – Vedtaket i kommunestyret vart gjort mot åtte røyster, seier ordførar Magni Aa Berge (Sp).
– Eg beklagar at det ikkje vart noko av det. Eg hadde sett at vi fekk eit tyngdepunkt i Sogn også, men dessverre vart det ikkje slik, seier ordførar i Balestrand, Harald Offerdal. Kommunestyret i kommunen vedtok i går at kommunen skal halde fram åleine. I den rådgjevande folkerøystinga sa kring halvparten av innbyggjarane ja til samanslåing, og fleirtalet ville sjå mot Sogndal, Vik og Leikanger.
For Hornindal er Volda-alternativet heilt dødt. Nabokommunen i nord bestemte torsdag at dei vil ha ei ny folkerøysting før dei går vidare. Det vil ikkje ordførar Stig Olav Lødemel vente på, og ser heller mot Stryn, som har venta i spaning på at honndølane bestemmer seg.
Politikarane i Jølster sa i dag ja til å slå seg saman med Førde, Gaular og Naustdal kommune. Dette er i tråd med fleirtalet i folkerøystinga i april. Kommunestyret røysta over fleire punkt, der samtlege vart vedtekne med klar overvekt.
