– Vi kjem godt overeins. Ho er dyktig og veldig grei, seier 82 år gamle Evelyn Gunnarskog medan ho tek rundt Abeba Brahane frå Eritrea. Vi er ved Høyanger sjukeheim der Evelyn bur og Abeba jobbar.
– Det er så hyggeleg å få ei slik tilbakemelding, seier ei smilande Abeba.
– Utlendingane som jobbar på sjukeheimen er flinke og gode å ha med å gjere. Dei gjer ein ypparleg jobb. Utan dei stoppar Noreg, seier Kjell Gunnarskog, ektemannen til Evelyn som er på besøk på sjukeheimen.
– Avhengig av innvandring
– Vi lever stadig lengre, det blir fødd færre barn og ungdommane flyttar frå distrikta. Dette gjer at det i utkantane blir altfor få varme hender. Omfattande arbeidsinnvandring vil bli einaste redninga, seier han.
Abeba Brahane har jobba ved sjukeheimen i Høyanger i fem år. Ho snakkar godt norsk og gjer seg forstått med dei eldre.
– Det er ikkje problem å forstå Abeba, seier Evelyn Gunnarskog.
Ja og nei frå Frp
Nestleiar i Framstegspartiet på Vestlandet, Lars Svein Drabløs, stiller seg positiv til denne type innvandring.
– Dersom det norske samfunnet treng arbeidskraft er det greitt å hente folk frå utlandet. Men det aller beste er å engasjere vår eigen ungdom til å ta utdanning innan pleie og omsorg.
– Er det ok frå Frp med meir innvandring frå til dømes Eritrea for å sikre varme hender på sjukeheimane?
– Så lenge det er kvoteflyktningar som kjem inn, og dei har ein jobb å gå til, er det greitt, seier han. Drabløs seier nei til meir generell innvandring for å sikre arbeidskraft i distrikta.
