For fyrste gong vart Våt moro-festivalen arrangert i Florø denne helga. Og sjølv om dei knapt er ferdig, vil arrangør Roger Bareksten gjerne gå på eit år til.
– Monstersuksess!
– Dette var ein monstersuksess frå fyrste augneblink. Vi er ikkje heilt ferdig endå, men eg kan allereie garantere at det blir ny festival neste år.
– Korleis kan du garantere det utan å vite verken besøkstal eller økonomisk sluttresultat?
– På grunn av måten florøværingane har omfamna arrangementet på. Det har vore ei utruleg stemning i heile byen, og blant alle aktørane som har bidrege. Då har vi det grunnlaget vi treng.
Magisk stemning
– Korleis vil du oppsummere helga?
– Det var utruleg godt å få gjort stuntet ute på Kinn. For oss handla det ikkje om at dei absolutt skulle greie å krysse heile lina mellom fjelltoppane. Det handla om å skape ei magisk stemning, og det greidde dei.
Festivalen byrja på torsdag med eit stunt der profesjonelle linevandrerar skulle prøve å krysse dei to fjelltoppane som utgjer Kinna-klova på slak line.
– Det var stor oppslutnad omkring aktivitetane. Til og med fredag føremiddag i duskregn.
Fylte parken
Han er også nøgd med vasskrigen dei arrangerte i parken laurdag ettermiddag.
– Det har ikkje vore så mange menneske i parken sidan Åge Aleksandersen spelte der ein gong på åttitalet. Dette overgjekk alle forventingar.
– Ser du noko som burde vore gjort annleis?
– Det er alltid mange detaljar som kan snikrast på. Men vi er berre fornøgde no.
Etterlengta ferie
– Kva skal du gjere no?
– Fyrst skal vi arrangørane snakke saman og oppsummere. Så skal eg ta meg ein veldig, veldig lang ferie, ler han.
– Eg er sliten. Men sliten på ein veldig god måte, avsluttar Roger Bareksten.