«Denne er trillrund som ein julegris. Det er heilt nydeleg»

Laksefisket opna ved midnatt i mange elvar i heile Norge, og i den eksklusive Årøyelvi i Sogndal var stemninga høg då NRK var med på fisket klokka seks torsdag morgon.

– Ja, men den er godkjent. Det var både vanskeleg og moro å få has på denne. Eg mista jo nettopp ein fisk, så det var veldig kjekt å klare å ta denne, det seier Bjørn Jørgensen som har reist den lange vegen frå Senja til Sogndal for å vere med på fisket.

Han er del av eit følge frå Troms og Finnmark som har tatt turen til Årøyelvi i Sogndal for å fiske laks. Han fortel at han eg gåen i handa etter å ha fiska denne fisken.

– Det var litt av ein kamp å få opp denne fisken. Han drog seg langt nedover elva og til slutt måtte eg vere litt hard med han og dra han opp. Det er den vanskelegaste fisken eg har fanga her, seier Jørgensen.

God fangst mange stadar i landet

Det vert meldt om gode laksefangstar i fleire elvar i natt:

• I Eidselva vert det meldt om fangst av sju laks og to aure, i Gloppenelva vert det meldt om fangst av fire laks på til saman 40 kilo
• I landet tredje største lakseelv, Namsen, har det blitt tatt fleire storlaksar i natt. Terje Haverstad og Ole Petter Kleiven fekk ein storlaks på 18,9 kilo.
• I Gaula fekk Pekka Karkkolainen ein laks på 13 kilo på Evjen i Lundamo, og i Orkla fekk Ellen Mousund ein fisk på 10,5 kilo på Kvåle
• I den største og viktigaste lakseelva på Nordmøre, Surna vart den første laksen tatt etter berre ti minutt

– Sju er tatt så langt og den største var nesten 11 kilo. Med tanke på at vêret ikkje var perfekt i natt, så lovar dette godt, seier Georg Solem i Surna Elveeigarlag.

• Les også: Har bygd eksklusivt hotell for laksefiskerne

Skryt av Årøyelvi

Bjørn Jørgensen hevdar at Årøyelvi no overgår Altaelva.

– Vi fiskar mykje i Altaleva og, men det er klart vi tek turen hit, for her veit vi at vi kan få store fiskar, seier Jørgensen.

Han ser på fisken han akkurat har dratt i land.

– Vi får like store fiskar i Altaelva, men her er det akkurat no berre jamt store fiskar på 8–10 kilo. Denne er trillrund som ein julegris. Det er heilt nydeleg, seier Jørgensen.

Dei andre i følget ligg og søv, mens Bjørn fekk fisk etter tre kast.

– Ja, no kan dei angre seg seier Bjørn med eit smil. Han fekk neste fisk etter to kast.

Glad elveeigar

– Junifiske med sprek og nyankommen laks er noko av det beste du kan vere med på seier elveeigar og seljar av fiskerettar, Knut Munthe Olsen.

Han trur likevel Jørgensen kan vere litt prega av å akkurat ha fått fisk.

– Det er uansett kjempegøy at han skryt av elva. Og det at han seier den slår Altaelva er jo musikk i mine øyrer seier ein munter elveeigar.