«Den som vil mest, tek poenga i dag»

Sogndal-trenar Eirik Bakke er klar på at dei kjem til å møte eit ekstremt gira Jerv, som i dag spelar sesongens første heimekamp i 1. divisjon når dei tek i mot Sogndal på Levermyr stadion i Grimstad.

Eirik Bakke

TØFT: – Jerv kjem til å overraske mange lag i årets sesong, det er eg sikker på. I dag må vi vere på hogget for å ta med oss poeng heim, seier Sogndal-trenar Eirik Bakke.

Foto: Alf Vidar Snæland / NRK

– Det blir ein tøff kamp. Vi må vere skikkeleg på for å få med oss poeng heim att. Dei er eit ungt, godt og fysisk lag som spring mykje, og dei er godt samstemte, seier Bakke, som har gjort heimeleksa si.

Det er 28 år sidan sist Grimstad-laget var på fotballens nest høgste nivå i Norge, og det er venta omm mot 1.200 tilskodarar på kampen i kveld klokka 18.00. Førre helg gav dei Sandnes Ulf ein real vekkjar etter at sandnesgaukane hadde hatt Jerv i kne i heile første omgang. Kampen enda til slutt 2–2.

– Dei var knalltøffe førre kamp, så Jerv kjem ikkje til å bli nokon kasteball, trur Bakke.

Laster innhold, vennligst vent..

Har fått reisa ut av kroppen

Troppen til Sogndal drog nedover mot Grimstad allereie fredag, for å vere sikre på at reisa var godt ute av kroppen før kampen søndag.

– Vi er vane til å reise langt, så det brukar vi ikkje krefter på. Vi har fått førebudd oss godt og har hatt gode treningar. No er det berre opp til oss sjølve å prestere, seier Bakke.

Troppen som er med til Grimstad er: Mathias Dyngeland, Christian Sukke, Bjørn Inge Utvik, Hannu Patronen, Christophe Psyché, Victor Grodås, Eirik Skaasheim, Petter Strand, Babacar Sarr, Rune Bolseth, Lars Christian Kjemhus, Edin Øy, Jim Johansen, Robin Shroot, Mahatma Otoo, Ulrik Flo og Kristian Fardal Opseth.

Robin Shroot jublar for Sogndal-scoring

NY SCORING? Robin Shroot, som kom frå Hødd, scora førre kamp sitt første seriemål for Sogndal. Kan han score sitt andre i dag?

Foto: Alf Vidar Snæland / NRK

Otoo tilbake etter skade

Lagoppstillinga vert først klar om lag ein time før kampstart.

– Otoo er tilbake etter å ha vore ute med skade. Taijo Teniste er framleis ute med ankelskade og er neppe tilbake før om ei veke eller to. Men elles er troppen bra, seier Bakke.

Førre helg leika Sogndal seg til siger over Bærum 3-1, og fekk dermed ein herleg seriestart på heimebane. Men Bakke åtvarar mot å ta lett på kampen i dag.

– Fotballsesongen er lang.Vi har jobba i tre månadar med måten vi skal spele på, og spelarane veit kva dei skal gjere. Men det tek nok litt tid før vi er heilt der vi ønskjer å vere. I dag vert det ein krig på gras, seier Bakke, som er budd på ein tøff kamp.

Regjeringa vil ha større konkurranse i landbruket, men bøndene på Vestlandet er skeptiske.
Atle Steinar Solheim vart overraska med nyheita om at han er ein av fem nominerte
Over 80 barn var samla på Jølstraholmen for å tjuvstarte adventstida med pynting av pepperkakehus.