– Vi har ein krevjande kamp framføre oss

– Det er ingen grunn til å senke skuldrene her, det er sterke interesser i Hardanger, Bergen og delar av Hallingdal som jobbar mot oss, seier Aarvoll.

Han seier at desse interessene no mobiliserer, og gjer det dei kan for å stogge planane om å satse på Hemsedalsfjellet. Dei vil nemleg heller ha Hardangervidda som hovudveg.

– Det er sterke reiselivsinteresser og næringslivsaktørar som no jobbar for å lage motrapportar som kjem til motsett konklusjon av Vegvesenet. Det tyder at det er no framover den verkelege kampen vil kome.

Les også: Håpar på veg over Hemsedalsfjellet

Noralv Distad er leiar for samferdsleutvalet på fylkestinget, og også han trur at det må kjempast ein hard kamp framover.

– Eg er særleg bekymra for at nokre politikarar forsøkjer å skape motsetnader som det ikkje er grunnlag for. Det høyrer vi til dømes frå Frank Sve i Møre og Romsdal som set vegen over Hemsedalsfjellet opp mot vegprosjekt som dei jobbar for i det fylket.

Distad trur ikkje noko på slike motsetnadar, og meiner at det einaste valet som no skal takast, er om hovudvegen skal gå over Hemsedalsfjellet eller Hardangervidda.

Les også: Hemsedalsfjellet er valt

– Dette er heilt ope

Harald Victor Hove er dagleg leiar i Hardangerfjelltunellane AS, og ein av dei som jobbar aller mest for at vegen over Hardangervidda skal bli hovudveg i staden for Hemsefdalsfjellet.

– Dette er ein heilt open kamp som skal avgjerast i Stortinget, og vi kjem til å gjere vårt for å fortelje politikarane kvifor Hardangervidda er det beste valet, seier Hove.

Han stadfestar at næringslivet i Hordaland har nytta ressursar på å kome med alternativ til Vegvesenet sin konklusjon.

– Vegvesenet sin konklusjon var eigentleg at det var dødt løp mellom dei to alternativa, og då er det jo naturleg at ein prøver å setje lys på noko av dei punkta som dei ikkje har gått inn på.