– Denne stortingsperioden er snart over, og vi har ikkje høyrt noko. Eg trur ikkje dei kjem til å flytte noko særleg ut av Oslo, seier Sp-leiar Trygve Slagsvold Vedum.
Det var i sommar at Venstre gjekk ut og sa at dei hadde fått gjennomslag for å flytte statlege jobbar ut frå Oslo. Avtalen var eit kompromiss, og Venstre gjekk til gjengjeld med på å akseptere regjeringa sitt nye inntektssystem for kommunane.
I utgangspunktet skulle planen for utflyttinga verte presentert før jul. No har Vedum mista heilt trua på at noko kjem til å skje.
– Det kan hende vi får ein eller anna plan i siste liten, men det byrjar å bli for seint å få til noko skikkeleg.
– Vi jobbar med saka
Stortingsrepresentant for Venstre Sveinung Rotevatn seier at dei jobbar med å presentere ei utflytting.
– Grunnen til at dette har teke tid er at vi sit i forhandlingar med regjeringa om kva arbeidsplassar vi skal flytte, og korleis vi skal gjere det.
Rotevatn er lite imponert over kritikken frå Vedum.
– Eg skjønar godt at Senterpartiet er utolmodige, for dei fekk jo ikkje til noko som helst av dette då dei sat i regjering i åtte år.
Han seier at det viktigaste for Venstre er at dei får på plass ein god avtale, og han vil ikkje kommentere kor tid det skjer.
– Eit dyrt og lite effektivt tiltak
Men medan Venstre og Senterpartiet kranglar om kven som er flinkast til å flytte ut offentlege arbeidsplassar, er ikkje alle samde i at det er ein god ide i det heile.
– Det er ikkje statleg byråkrati som skaper vekst på bygda. Å flytte ut slike arbeidsplassar er eit dyrt og lite effektivt tiltak. Dei seier politisk økonom i den liberale tankesmia Civita, Anne Siri Bekkelund.
Ho syner til tidlegare erfaringar med å flytte arbeidsplassar i staten frå Oslo, og ut til distrikta.
Har blitt gjort før
Førre gong det vart flytta slike arbeidsplassar var det også ei borgarleg regjering. Bondevik II-regjeringa flytta sju statlege tilsyn frå Oslo og ut i distrikta. Til saman utgjorde det rundt 900 arbeidsplassar.
Det var mellom anna luftfartstilsynet til Bodø og Medietilsynet til Fredrikstad.
– Det var ein stor suksess å flytte ut dei arbeidsplassane. Det gav veldig mange positive ringverknader, og det var bra for verksemdene. Det seier Victor Norman, som var arbeidsminister i Bondevik II-regjeringa, og arkitekten bak utflyttinga.
Norman avfeiar kritikken frå Civita.
– Ja, vi fekk tak i flinke folk. Faktisk meiner eg at vi fekk flinkare folk enn før tilsyna vart flytta ut.