Sjåførar hevdar dei blir forskjellsbehandla av vegvesenet

Statens vegvesen fortel at stadig fleire tungbilsjåførar stikk av frå kontrollar på Vestlandet.

Skilta står godt synlege langs vegen, men Vegvesenet opplever stadig oftare at sjåførane gir blaffen i skilta og susar forbi.

– Uakseptabelt

Fylkesleiar Per A. Øren i Norsk Lastebileigarforbund seier dette er uakseptabelt, men trur noko av årsaka kan vere at norske sjåførar meiner dei utanlandske lettare slepp unna.

– I første omgang tykkjer eg ikkje det er bra, for vi skal følgje skilting og kontrollar. Men eg har høyrt at utlendingar ikkje blir vinka inn, og då vel norske sjåførar å køyre forbi fordi dei blir forarga, seier Øren.

Øren seier det ikkje er bra for næringa at sjåførar stikk av frå kontrollar. Han seier det er viktig at bil og utstyr er i orden.

• LES OGSÅ: Stadig fleire gir blaffen i desse skilta - køyrer i staden rett forbi
• LES OGSÅ: - Kvifor stogga dei meg ikkje på grensa, men 350 kilometer unna?

(Artikkelen held fram under biletet)

Blir kraftig irriterte

Statens vegvesen seier at dersom dei oppdagar at folk stikk av, så set dei i verk tiltak ved seinare kontrollar på strekninga.

– Eg høyrer dei seier det, men det er ikkje den erfaring vi høyrer om. Det er eit veldig bra opplegg på Håbakken i Lærdal, men slik er det ikkje i heile landet, seier Øren.

• LES OGSÅ: Politimelde dobbelt så mange sjåførar som i same periode i fjor
• LES OGSÅ: Dette er det nyaste våpenet i jakta på vogntog med farlige bremser

– Men det at andre stikk av, er det eit argument for å gjere det same?

– Nei, det er det ikkje. Er det skilta at det er kontroll, så skal ein køyre inn til kontroll.

– Kvifor er det enkelte lastebilsjåførar som vel å ikkje gjere det?

– Dei blir kraftig irriterte over forskjellsbehandlinga. Som sagt kan eg ikkje bevise dette, og eg kan ikkje gå god for at det er slik.

Avviser kritikken

Senioringeniør Tore Eikeland i region Vest avviser at dei gjer forskjell på norske og utanlandske bilar.

– Vi forskjellsbehandlar ikkje. Vi ser ikkje på nasjonalitet og driv altså ikkje med forskjellsbehandling, seier Eikeland.