– Unge menneske søker mot urbane strok, og då må distriktsskulane våre bli gode fagleg og ha spennande tilbod, seier Reikvam.
– Prioriter
Høgskulen i Sogn og Fjordane har i årevis slite med å rekruttere studentar, og fagutdanningar har stått i fare for å bli lagde ned. Men kanskje må ein kvitte seg med nokre tilbod og reindyrke andre skal ein gjere Høgskulen her meir attraktiv, seier SV-politikaren. Han trur høgskulen kan snu den negative rekrutteringsutviklinga ved å bli best på sine felt.
– Det handlar om prioritering, og kanskje må ein kutte ut nokre av dagens fag for å få dette til, seier han.
Frykt for karakterkrav
For ei tid tilbake protesterte sterke røyster i fylket mot strengare opptakskrav til lærarutdanningane. Rektor Johs Thaule ved Høgskulen i Sogn og Fjordane frykta dette ville slå beina under lærarutdanninga i Sogndal, fordi skulen rekrutterer på grunn av nettopp låge opptakskrav.
– Bli best
Men Reikvam oppmodar til å tenke heilt motsett.
– Skulen må bli best på lærarutdanning. Sats på ei femårig utdanning bygd opp etter mønster av resten av den høgare utdanninga med bachelor og mastergrad. Sats på tverrfaglege tilbod. Til saman vil dette gje skulen ei fantastisk spanande utdanning som vil vera attraktiv langt utanfor Sogn og Fjordane, er råda frå Reikvam.