Det seier Linda Ullensvang frå Os. Som så mange gonger før tek ho snøggbåten frå Sogndal til Bergen etter haustferie i Sogn.
I framtida kan turen bli 16 prosent dyrare, dersom fylkespolitikarane får det som dei vil.
– Det blir litt feil for dei som brukar båten mykje. Vi brukar ikkje båten så mykje, så vi vil nok halde fram med å ta den, seier Ullensvang.
– Ikkje usamde, men ...
Fylkespolitikarane vil jamne ut prisskilnaden på snøggbåtrutene mellom Bergen og Nordfjord og Sogn. Løysinga er å auke prisen så sogneruta, og ei lita nedjustering av den
.Sidan 90-talet har prisane for Sognebåten blitt rekna ut etter luftlinje. Frå Selje er prisane utrekna etter nautiske mil.
Prisjusteringa har vakt reaksjonar i Sogn. Dei fryktar følgjene for reiselivsnæringa, næringslivet og innbyggjarane. Ruta har i år 20 prosent fleire reisande enn i fjor.
- Les også:
– Vi er ikkje usamde i ei prisharmonering, men vi meiner det må skje gradvis, seier ei av dei mest kritiske røystene, Balestrand-ordførar Harald Offerdal (Ap).
Kjenner seg svikta
Prisauken frå Balestrand til Bergen er på 95 kroner, eller 16 prosent. Turen blir prosentvis dyrare jo lenger ut i fjorden ein kjem. Frå Høyanger blir turen 115 kroner dyrare, eller 25 prosent.
- Les også:
Offerdal kjenner seg svikta av sine eigne. Det var Arbeidpartikollegaer som fremja prisendringa i Hovudutval for samferdsle.
– Eg tykkjer fylkesadministrasjonen hadde ei fornuftig tilnærming, der dei la opp til gradvis nedgang på Nordfjord og gradvis auke på Sogn. Du treng ikkje vere rakettforskar for å forstå at prisauken vil gå utover passasjergrunnlaget, seier han.
Må ha rettferdig pris
Offerdal er skuffa over at ordførarane i Sogn ikkje har fått uttala seg. Harald Bjarte Reite er ein av Ap-politikarane bak framlegget.
– Vi skal ha fokus på samferdsletenester til innbyggjarane, og ikkje nødvendigvis næringsliv og reiseliv. Vi må ha ein rettferdig pris, seier han og legg til endringa framleis skal vedtakast i fylkestinget.
– Politikkens vesen og veg er at vi er opne for alle innspel som kjem, seier han.
Kortar reisevegen
Tilbake på båten blir Helge og Grethe Grønningsæter nye passasjerar i Vik. Dei er blant dei mange som nyttar båten til og frå reisemål i fylket. Siste 11 åra har dei pendla til jobb i Høyanger.
I dag skal dei til Nordeide og vidare med bussen til Førde.
– Det ville vore tungvint å køyre to timar på ein slitsam veg og med ferje. Eg trur ikkje vi kunne hatt jobben i Høyanger utan båten, seier dei og trur folk flest meiner båten er dyr nok som den er i dag.