– Oteren tek fisken i elva, og han forstyrrar fisken veldig. Det er mykje verre å fiske no enn før. Fiskemengda har gått dramatisk ned, det ser eg.
Inge Bergheim frå Byrkjelo i Gloppen i Nordfjord er frustrert. Han merka fyrst til oteren for fem-seks år sidan, men seier at dei siste to åra har det blitt mykje meir oter i elva utanfor huset hans.
– Eg vert lei meg og skuffa, for eg har fiska her sidan eg var seks år. Det er ei stor naturoppleving.
Øydelegg fisket
Bergheim har vore ein entusiastisk fritidsfiskar heile livet, og er spesielt glad i elvene rundt Bergeimsvatnet i Byrkjelo – eit populært fiskeområde for aure. Men den siste tida har han merka at mykje av fisken har forsvunne frå elvane. Dette trur han er oteren sin feil.
– Han tømmer elva om vinteren, for då kjem ikkje fisken seg unna. Dette går ut over både dei lokale og dei tilreisande fiskarane.
Oteren har vore totalfreda i Noreg sidan 1982, då var han nærast utryddingstrua av pelsjegerar. Det er uklart kor mange otrar det eigentleg er i Noreg i dag.
Bergheim meiner at fredinga av oteren er ei misforståing.
– Her er veldig mykje oter, meir enn folk trur.
– Ille ute om ti år
Dersom dei ikkje får lov til å gjere noko med oteren, fryktar Bergheim for korleis fisket vil vere i framtida.
– Dei doblar bestanden sin på tre år, og får dei fortsetje som no så er vi ille ute om ti år. Då vert det ikkje vits å fiske i elvene lenger, så hardt ramma som dei vert.
Det er ikkje berre gleda og naturopplevinga ved fisket som står på spel for Bergheim.
– Eg er veldig glad i varmrøykt aure med eggesmør og salat. Det er veldig god mat, og det vert det heilt garantert mindre av framover, seier han.
– Oteren må få vere oter
– Fortsatt er situasjonen slik at ein ser ein nedgang i oterbestanden, sjølv om han geografisk har spreidd seg meir, seier Erik Lund i Miljødirektoratet.
Han hevdar det framleis er grunn til å verne om oteren, sjølv om han ikkje lenger er utrydningstrua.
– Oteren er sårbar. Han har eit særskild vern grunna bestandsnedgangen.
Vidare påpeiker Lund at fylkesmannen gir fellingstillating for oter dersom det er påkrevd.
– Oteren vil frå tid til annan gjere skade, men det generelle biletet er at oteren må få lov til å vere oter, og at han et fisk, det er heilt normalt. Og dei største truslane mot fiskebestandane i elv er faktisk vassdragsregulering og fiske.