– Nedrykket er klart og vi må tenke nytt

Nygård meiner det er uinteressant om Førde tapar kampane resten av sesongen.

– Det viktige er å sjå mot neste sesong. Nedrykket er klart og vi må tenke nytt. Dei som meiner noko anna bør finne seg noko anna å drive med, meiner Nygård.

2. divisjonslaget til Førde har fått det tøft i årets andredivisjon. Laget ligg nest sist på tabellen med 13 poeng opp til sikker plass med ti rundar att å spele.

Dei siste fem kampane har alle enda med tap og ein må tilbake til 11. juni for å finne siste siger, 1–0 mot Vard Haugesund.

• Les også: Førde går mot nedrykk, men trenaren sit trygt

Yngre lag

Kai Vidar Nygård er ingen kven som helst innan Førde-fotballen. Han spelte for klubben ei årrekke og er kjend for sin harde og oppofrande spelestil.

I eit innlegg på Facebook tysdag etterlyste Nygård fleire spelarar som vil blø for drakta. Han trur rekrutteringa må ta noko av skulda for resultata.

– Det som undrar meg er at trenaren seier han skal satse ungt for så å hente inn åtte spelarar utan erfaring frå høgt nivå. I ein sesong der så mange lag skal rykke ned, burde dei henta eit par spelarar med erfaring frå høgt nivå. Resten kan vere lokale unggutar, meiner han.

• Les også: Nok eit Førdetap – utespelar måtte i mål

Meiner kritikken er unyansert

I år skal divisjonssystemet i norsk fotball omstrukturerast og andredivisjon går frå fire til to avdelingar. Det betyr at heile sju lag frå kvar avdeling i år vil rykke ned til tredjedivisjon.

Sportsleg leiar i Førde fotball, Johan Pettersen, forstår at det blir stilt spørsmål etter resultata klubben har hatt.

– Eg forstår jo at folk stiller spørsmål i den perioden vi er inne i no, men når det gjeld kritikken knytt til spelarrekruttering så ha fleire av dei åtte spelarane det er snakk erfaring frå andredivisjon. Alle har heller ikkje vore heile sesongen og stengd ungdommen ute, så vi oppfattar nok den som litt unyansert.

Bra med engasjement

Styreleiar i Førde fotball, Leif Arne Aasen, seier styret har registrert at årets resultat ikkje har nådd opp til forventningane, men har full tillit til den sportslege styringa. Han synest det er positivt at klubben engasjerer.

– Nygård er jo tidlegare Førde-spelar og har mykje kunnskap. Han er absolutt ein ressurs og fleire av innspela hans er veldig konstruktive. Vi synest jo det er flott at folk er engasjert og meiningar.