– Karadas akkurat det Sogndal treng

Måndag kveld vart det klart at eidaren Azar Karadas skal spele i kvitt og svart ut sesongen .

Sogndal-kjennar Jon Navarsete er ikkje i tvil om at nordfjordingen er akkurat det klubben treng for å snu motgangen.

• LES OGSÅ: Karadas sikra laget opprykk
• LES OGSÅ: Klubblause Karadas har tilbod frå fleire skandinaviske klubbar

– Azar er ein type som kan vekkje heile flokken i kraft av den han er. Når han går på bana så luktar det svidd. Han er ein kraftplugg som gir alt, alltid. Eg trur han kan medverke med eksempelets makt i høve til duellspelet. Og så er han ein vinnartype, seier han.

– Må gjere grep

Etter å ha ligge på sølvplass etter seks seriekampar, inntok Sogndal i helga den utsette 14.-plassen som betyr kvalifiseringsspel for å halde plassen i eliteserien.

Med ti kampar att av sesongen har laget fått kniven på strupen. Navarsete er mellom dei som ikkje har latt seg imponere av måten Sogndal har stått fram etter ferien.

– Men å hente inn ein spelar på så kort sikt, er ikkje det krampetrekning for å berge plassen?

– Nei, det er ikkje det. Berre sjå kva andre klubbar gjer. Når du er i ein slik situasjon, så må du gjere grep. Pila har peika nedover heile vegen etter sommarferien. Ikkje scorar dei, dei verkar tafatt, tek leiinga og legg seg bakpå og overlet alt til dei andre. Eg trur Azar kan vere ein spelartype som kan vekkje heile flokken, gå føre og brøyte rydning. Det er slik han er, seier Navarsete.

(Artikkelen held fram under tabellen)

Etterlyste leiar

Måndag bad Saftkokaradn spelarane om å gå i seg sjølve for å snu trenden .

Dei etterlyste både ein tydeleg leiarprofil på bana, kollektiv samhandling og ikkje minst spelarane sin sjølvtillit og trua på det dei driv med.

– Det er det individuelle blant spelarane som sviktar når dei skal fungere kollektivt. Det har vore ein tendens sidan rett før sommarferien. Det handlar om å få i gang kollektivet, at spelarane kjenner sine oppgåver for at Sogndal skal fungere som eit fotballag, sa arrangementsansvarleg Geir Frode Lunden.

Typisk motgangssignal

Navarsete er langt på veg samd med supporterane sin analyse om kva som har gått dei siste kampane.

På 14 kampar har Sogndal sanka sju poeng.

– Vi har ikkje noko markert leiarprofil i laget. I ein slik motgangsperiode så blir det meir og meir synleg. Mot Sandnes Ulf sist hadde Sogndal grepet på kampen, men målet førte til at dei trekte seg attende for å safe og sikre, og så gir ein initiativet frå seg. I høve til å gå på og krige, og gå for siger, så er det eit litt typisk motgangssignal, seier han.

– Kan Karadas vere denne leiartypen?

– Det trur eg heilt klart.

Må løfte i flokk

Navarsete gir også Saftkokaradn medhald i at spelarane også må gå i seg sjølve. 31-årige Karadas vil ikkje åleine berge kontrakten til Sogndal.

– Men han kan vere ein som medverkar til at mange rundt han vaknar, han går føre og gir laget litt ny inspirasjon og sjølvtillit, og ikkje minst guts. Vi må få fram kampmoralen mykje meir hos alle. Så må vi få eit lag som fungerer saman. Eg tykkjer det har halta no i fleire kampar. Det er laget Sogndal som må stå fram no i den vanskelege perioden som kjem, seier han og legg til:

– Heile flokken må vakne og skjønne kva dette handlar om. Dei må byrje å krige. Å berge ein kontrakt er ein krevjande jobb. No har vi eitt av topplaga heime, og så skal vi til Fredrikstad. Desse kampane betyr ein del, avsluttar han.