– I Sogndal er det greitt å lukta bål på forelesing

SOGNDAL (NRK): Her vakna studentane opp tysdag morgon, knappe to timar før første forelesing.

Lurkarlaget i Sogndal på tur

UT PÅ TUR, ALDRI SUR: Janni Røssevold (nærmast kamera) studerer økonomi og administrasjon i Sogndal. – Dette er ein kjempefin måte å starta ein tysdag på.

Foto: Sondre Dalaker / NRK

Det er tysdag morgon på Amlaholten på Kaupanger i Sogndal kommune. Klokka nærmar seg 07.30, og i hengekøyene som er spent opp mellom trea, byrjar dei som har sove lengst å vakna. Attmed bålet er dei ivrigaste allereie i gang med å koka kaffi og steika bacon, lappar og pannekaker. Om mindre enn to timar startar første forelesing nede på Høgskulen på Vestlandet i Sogndal for dei fleste av dei som har overnatta ute denne natta.

Lurkarlaget på tur

MORGONSTUND: Her vakna dei 17 lurkisane opp tysdag morgon. Etter ein god frukost rundt bålet, ventar snart skulebenken.

Foto: Sondre Dalaker / NRK

– Det er greitt å koma på forelesing med bållukt og fjellsko?

– Det er heilt innanfor. Det er kulare å ha vore ute på tur enn heime framfor TV-en, seier Janni Røssevold.

Ho er andreårsstudent i Sogndal, og sit i styret i Lurkarlaget, som er studentane i Sogndal sin friluftsorganisasjon.

På tur kvar veke

Kvar einaste veke studieåret rundt arrangerer dei turar og aktivitetar. Alt frå korte dagsturar på ettermiddagane, klatring og sykling, til lange turar i fjellet i helgene.

– I helgene søv me ute eller på DNT-hytter, me reiser på surfeleir, skitur eller sykkeltur. Det er mange tilbod til alt og alle, frå ekstremsyklisten til dei som knapt veit kva ein sovepose er, seier Røssevold. Dei åtte personane i styret brukar mykje av fritida si på å gi medstudentane eit godt friluftstilbod og ein annan møteplass enn skulebenken.

Ved starten av studieåret pleier dei å vera rundt 300 medlemmar. Ved slutten nærmare 500.

Det er over ein femtedel av alle som studerer i Sogndal.

– Dei ferske studentane er raske å melda seg inn. Dei som har studert her tidlegare stressar ikkje like mykje med det, seier Røssevold, og ler litt.

Lurkarlaget på tur

PANNEKAKER OG KAFFI: Dei leikar ikkje friluftsliv. Kokekaffi og pannekaker høyrer med.

Foto: Sondre Dalaker / NRK

Sogndal er ein populær studiestad, og mange vel å søka seg til bygda ved Sognefjorden på grunn av moglegheitene for friluftsliv .

– Om vinteren er det mange som går rett frå forelesing til skitur. Då går dei ut av klasserommet med skibaggen på skuldra.

Nye «lurkisar» på tur

– Eg vil bli kjent med andre som likar å vera på tur. Eg har aldri sove i hengekøye før, så dette var første natt, seier Elisabeth Knedahl Hansen.

– Du datt ikkje ned?

– Nei, det gjekk heldigvis bra, ler ho.

– Eg studerte i Bergen i fjor. Det er veldig mykje betre å studera i Sogndal å ha moglegheita til dette her, seier Nicolai Drager, som saman med Knedahl Hansen er nye «lurkisar», som medlemmane kallar seg sjølv.

Lurkarlaget på tur

SNART SKULE: Bålet blir sløkt og hengekøyene pakka saman. Snart ventar pensumbøker i staden for bålkos.

Foto: Sondre Dalaker / NRK