– Ein ting hadde vore viss Neteland fekk sparken eller vart sagt opp, men her er det ein frivilleg sak der han vel å gå frå stillinga. At han då skal ta med seg 2,2 millionar kroner, synest eg ingenting om, seier gruppeleiar for Frp på fylkestinget, Frank Willy Djuvik.
– Han får betalt for å vere illojal, og ikkje lite heller, tordnar Frp-toppen vidare.
– Det er usant. Det er inga premiering, men ei oppfølging av ei avtale som vart inngått allereie før Neteland tiltredde stillinga, svarar tidlegare styreleiar i Fjord1 Reidar Sandal.
Vil be om å sjå avtalen
Den langvarige maktkampen mellom styret i Fjord1 og hovudeigar fylkeskommunen, enda med at fylkestinget pressa igjennom viljen sin og vedtok å selje eigarposten i Fjord1 til transportselskapet Torghatten.
Dette førte til at både toppsjefen i Fjord1, Dagfinn Neteland, og fleire styremedlemmar i Fjord1, med styreleiar Reidar Sandal i spissen, trekte seg i protest. Neteland fekk ei etterløn på 2,2 millionar kroner.
Fylkesordførar Jenny Følling (Sp) likar ikkje etterlønsavtalen, og vil be om å få sjå han.
– Nei, eg er overraska over at avtalen kan utløyse etterløn i den situasjonen som selskapet er i. Det er heilt klart at det er styret sitt ansvar.
– Du vil be om å få avtalen: Betyr det at du ikkje stoler på det Reidar Sandal har gjort her?
– Eg tenkjer styret har handtert saka, men det må også vere greit at eigar får sjå avtalen.
– Folk reagerer nok negativt
Reidar Sandal seier det må vere opp til sitjande Fjord1-styre om dei vil gje Følling innsyn i etterlønsavtalen. Han angrar ikkje på at han gav Neteland ei solid etterløn.
– Styret gjekk inn i dette etter nøye vurdering. Dette er eit dokument som er utarbeida av folk med den fremste kompetanse på arbeidsrettsforhold. Eg føler meg veldig trygg på vurderingane. I tilsetjingsavtalen heiter det at han har rett til etterløn dersom det skjer vesentlege strukturendringar i selskapet, mellom anna vesentlege endringar i eigarsamansetninga, seier den tidlegare styreleiaren.
Gruppeleiar i Høgre, Noralv Distad, er kritisk til etterlønsavtalen. Heller ikkje fylkesleiar i Krf, Trude Brosvik, har sans for Neteland si etterløn.
– Ein bør ikkje inngå den typen lønnsavtalar der direktøren får etterløn om han seier opp i protest. Folk reagerer nok veldig negativt på den typen etterløn, seier Brosvik.
– Ein avtale som må følgjast opp og handhevast på ein sakleg måte. Det er det vi har gjort no når eigarsituasjonen er fundamentalt endra, seier Sandal.