NRK Meny
Normal

Har blitt benkeslitar medan laget er i medvind: – Dette må eg berre takle

Even Hovland har ikkje starta ein einaste kamp for Nürnberg sidan slutten av oktober.

Even Hovland (t.v.) i duell med Matthias Morys i den tyske cupen

FRÅ BANA TIL BENKEN: Even Hovland (t.v.) var ein sentral spelar for Nürnberg fram til oktober. Sidan då har han varma benken for opprykkskandidatane.

Foto: Daniel Maurer / Epa

– Det er aldri kjekt å ikkje få spele. Men no gjer laget det bra, og vi vinn stort sett heile tida. Då er det vanskeleg å få moglegheita, seier Even Hovland.

Han opplever for tida den kanskje lengste samanhengande perioden i karrieren utan speletid: Dei første elleve kampane av sesongen spelte han samtlege minutt for Nürnberg i 2. Bundesliga – deretter har han varma benken for tyskarane i 13 kampar på rad.

Sidan oktober har han berre fått 32 minutt som innbytar.

– Eg må berre trene og vere klar når moglegheita kjem. For før eller seinare kjem den med skadar og karantene på dei andre, seier Hovland.

Må vurdere alternativ om ting ikkje snur

Etter ein rufsete start på sesongen har Nürnberg blanda seg inn i opprykkskampen på nest høgste nivå i Tyskland. Klubben ligg på tredjeplass, tre poeng bak Freiburg på plassen framfor. Og med eit lag i flyt, er det tyngre å spele seg inn i førsteellevaren.

– Eg er aldri nøgd når eg ikkje spelar. Men det er vanskeleg å forlange noko når laget gjer det så bra. Eg må berre vere tolmodig, seier Hovland.

– Kor lenge kan du ha det slik?

– Det viktigaste er at laget vinn, og at vi kjempar om opprykk til Bundesliga. Eg må berre vere tolmodig og vente. Så får eg heller vurdere andre ting om det ikkje skulle snu, seier midtstopparen.

– Per dags dato har eg ikkje vore inne på tankar om noko som helst anna. Eg har fokus på opprykk, og håpar å få sjansen ein av dei neste kampane, seier Hovland.

Forren

PÅ LANDSLAGET: Even Hovland (t.v.) har vore ein klippe på det norske landslaget saman med stopparmakker Vegard Forren (midten).

Foto: Grøtt, Vegard Wivestad / NTB scanpix

Kan ikkje vere sikker på landslagsplassen

Nürnberg møter fredag kveld Kaiserslautern – eit oppgjer heimelaget er favorittar til å vinne. Etter kampen er det ni kampar igjen å spele. Hovland er trygg på at han kjem til å få sjansen. Før eller seinare.

– Det er slik vi fotballspelarar har det. Om vi ikkje spelar, er det ikkje like kjekt – men elles er det topp. Dette må eg berre takle, seier han.

Han har vore fast inventar på det norske landslaget den siste tida. I slutten av månaden ventar kampane mot Estland og Finland. Men Hovland vil ikkje ta eit landslagsuttak på forskot slik situasjonen er no.

– Klart at dersom eg ikkje spelar på klubblaget, blir det vanskelegare der også. Men det får eg ta når den tida kjem. Eg må berre konsentrere meg om å komme inn att på laget i Nürnberg.

Laster innhold, vennligst vent..
Stor auke i bedriftar som tilbyr opplevingar til turistar
Fotballfeber i Florø før tidenes første fjerderundekamp i cupen
veger, arbeid med reparering etter flommen, hotell, gjestehus, parkeringsplasser med busser, busser