– Eg er ingen beskjeden sunnfjording, men eg prøver å halde litt att. Det må vere sikkert før eg spretter champagnen, seier Askvoll-ordføraren som likevel er tydeleg smørblid i intervjuet med NRK.
– Det bikkar fram og tilbake
Ho kom seint fram til valvaken med resten av toppkandidatane frå fylket i Førde. Etter at vallokala stengde i heimkommunen Askvoll har Melvær gjort pliktene som ordførar i arbeidet med oppteljinga av stemmene.
Då ho entra lokala i Førde hadde ho ikkje fått med seg detaljane frå oppteljingane på landsplan, men hadde fått med seg at Høgre og FrP-regjeringa ser ut til å halde på makta.
– Eg håpar så grådig at det held heilt inn. Det er små marginar, det bikkar fram og tilbake, men eg håpar vi klarar å halde stand, seier ho til NRK.
- Les også:
Sterk framgang i heimkommunen
Like før klokka 23 er over 90 prosent av stemmene i Sogn og Fjordane talde opp. Høgre har gått tilbake med minimale 0,4 prosentpoeng i fylket og ligg på 18,7 prosent oppslutnad. Med det ligg Frida Melvær inne med det tredje stortingsmandatet.
I heimkommunen Askvoll gjer Høgre eit solid val, med 8 prosentpoeng framgang. Med 27,2 prosent av stemmene er regjeringspartiet likevel mindre enn Senterpartiet som endar på 32,4 prosent av stemmene.
Melvær er svært godt nøgd med den sterke veksten for eige parti.
– Vi har gått utruleg fram i forhold til tidlegare, så eg er takksam.
– Dersom dette skulle halde heilt inn, korleis vil du setje preg med din plass på stortinget?
– Det er høgrestemmer eg har fått, og dei skal eg ta godt vare på, er det kontante svaret frå toppkandidaten.
