– Betre at ungdom lærer om islam i moskéen

Den siste tida har fleire muslimar i Sogn og Fjordane engasjert seg for å etablere ein større møtestad for muslimar i fylket. Målet er blant anna å motverke ekstremisme.

• Les meir: Vil byggje moskéar for å motverke radikalisering

– Fleire vert radikaliserte fordi dei ikkje går i moskéen og lærer kva islam eigentleg er, seier Ayad Mawloud frå Førde Islamske Senter.

Radikalisering skjer i dei lukka miljøa

Forskar på islamistisk ekstremisme, Anne Birgitta Nilsen, støttar forslaget. Ho peikar på at radikalisering som oftast skjer online.

– Ungdom les om radikal islam på nettet. Det kan vere propaganda frå IS eller Al Qaida, og har lite å gjere med det som føregår i moskéane. Ofte handlar dette meir om politikk.

Ho erfarer at dei radikale miljøa islamistiske miljøa i Norge er små, og at radikale grupper held til i det ho kallar «kjellarmoskéar».

Derimot er dei store, «mainstream» moskéane viktige i kampen mot radikal islam.

– Å førebygge ekstremisme er noko moskéane er like så oppteken av som resten av samfunnet.

Må skje saman med muslimar, ikkje i frykt for dei

– Vi har mange eksempel på moskear i Norge som arbeider førebyggande mot radikalisering, seier Nilsen.

I Bergen har kommunen og politiet gått saman med moskeane i fylket i kampen mot ekstremisme.

Elisabeth Harnes frå RVTS, ressurssenteret som mellom anna jobbar mot vald og radikalisering, meiner dette er eit vellukka samarbeidsprosjekt.

– Vi har identifiserte kva sårbarheitsfaktorar som kan skape ekstreme haldningar eller idéar. Eit slikt samarbeid skapar god dialog mellom nøkkelpersonar i lokalsamfunna.

Ho meiner kampen mot radikal islam må skje saman med muslimane, og ikkje vere basert på frykt.

– For mange har dette vore ein kamp snudd på hovudet, der vanlege, moderate muslimar har kjent seg skulda for å vere ekstremist. Det finnast mange misforståingar og konspirasjonar som kan vere skadeleg.

– Vi må stå saman i kampen, seier ho.

Vil heller avgrense innvandringa

Innvandringspolitisk talsmann i Frp, Mazyar Keshvari, er skeptisk til at moskéar kan førebygge ekstremisme.

– Det er det nok lite som tyder på. Vi ser heller at ekstremismen aukar i takt med den massive innvandringa til Europa og at det dukkar opp fleire moskéar.

Han viser til personar som har reist som framandkrigarar etter å ha vore aktiv i muslimske miljø på Austlandet.

– Kva meiner Frp er viktigaste tiltak mot radikalisering?

– Det er å avgrense innvandringa, som er rota til hovudutfordringane. Det er ikkje berekraftig sosialt, økonomisk eller verdimessig. Frp i regjering har lagt fram ein offensiv plan mot radikalisering, anten det er snakk om islamistisk eller høgreekstrem ekstremisme.