– Aldri vore så nær som no

– Vi er ganske nær fasiten på korleis dette kjem til å fungere, seier leiar for prosjektet i Kystverket, Terje Andreassen.

For no er det tekniske forprosjektet klart. Dette dannar grunnlag for kvalitetssikringa som er neste fase i prosjektet før Stortinget til slutt skal bestemme om prosjektet blir noko av eller ikkje.

– No ha dei sett på løysingar, korleis ein skal få det til å fungere og har regulert området rundt. Vi har aldri vore nærare realisering enn vi er i dag, seier ein glad ordførar i Selje, Stein Robert Osdal.

Kostnadsrekna til 2,3 milliardar

Frå dei aller første skissene kom i 1870, har vegen fram vore kronglete og omstendeleg, men etter minst 17 utgreiingar, så er nok ein milepæl i hamn.

• Les også: Slik blir verdas største skipstunnel - bileta er klare
• Les også: Trur på løft for reiselivet

– Vi har ikkje planlagt i detalj, men no er vi trygge på at tunnelen kan byggast innfor dei økonomiske rammene som kostnadsoverslaget syner, seier Andreassen.

Han legg til at det alltid vil vere sikkerheit knytt til tunnelbygging, mellom anna på fjellkvaliteten.

– Her til lands har vi lang erfaring med tunneldrift, og vi har gjort simuleringar og modellforsøk på det meste. Prosjektet er ikkje så vanskeleg, men det er uvanlege, seier prosjektleiaren.

Ordføraren håpar no alt ligg til rette for eit positivt svar frå Stortinget i juni 2017.

– Då kan vi få byggestart i 2019, seier Osdal.