– Oljebasen er berre ein forsmak

Weaver som jobbar ved Høgskulen i Sogn og Fjordane og NTNU i Trondheim, trur lågare oljeprisar, høge lønningar og dyrare utbyggingar vil tvinga Statoil til å sentralisera aktiviteten sin på land for å spara pengar.

– Vi eksporterer 90 prosent av olje og gass, det betyr at vi må bli dyktigare når det gjeld kostnadsnivået for å konkurrera internasjonalt, seier han.

Blir mindre å gjera i Florø

Kvart år blir tonnevis med containerar lossa på skip ved Saga Fjord Base i Florø. Slike forsyningar blir frakta til og frå oljeplattformene i Nordsjøen via oljebasen i kystbyen. Men no skal Statoil endra seglingsrutene, slik at det blir mindre å gjera i Florø og meir på Mongstad.

Det vil bety 150 færre oljearbeidsplassar, ifølgje ein konsulentrapport. Høgrepolitikar Bjørn Hollevik var skuffa då sentraliseringa til Statoil blei kjent i november.

– Når dei plukkar på det vesle vi har, må vi byrja å stille spørsmål om kva ansvar Statoil tek på seg i vår region, sa han.

• LES OGSÅ: Har bestemt å byggje ned oljebasen
• LES OGSÅ: 150 arbeidsplassar forsvinn i Florø

Fryktar det kan bli få miljø

Sentraliseringa av landbaserte oljearbeidsplassar som Statoil er i gang med på Vestlandet, kan berre vera starten. Det er iallfall energipolitisk talsperson for Senterpartiet, Geir Pollestad, redd for.

– Eg fryktar at det blir sentralisert til nokre få miljø i landet. Det er ikkje bra, seier han.

Tre forhold kan pressa fram ei sentralisering av oljearbeidsplassar på land: For det fyrste er det varsla lågare olje- og gassprisar i åra som kjem. For det andre er dei norske oljelønningane så høge at dei svekkjer konkurranseevna internasjonalt. Og for det tredje blir oljen på norsk sokkel stadig dyrare å pumpa opp fordi han ligg djupare og lengre frå land.

• LES OGSÅ: Departementet vil ikkje overprøve Statoil si nedbyggjing i Florø
• LES OGSÅ: Trur ikkje lenger på at Statoil vil snu

Forstår Statoil

Energipolitisk talsperson i Framstegspartiet, Oskar Grimstad, har difor forståing for at Statoil byggjer ned i Florø.

– Når vi snakkar om mellom 200 og 400 millionar kroner årleg i innsparing, så forstår eg at det må takast omsyn til, seier han.

Geir Pollestad i Senterpartiet meiner derimot at Stortinget må stilla krav om spreidd landaktivitet når Statoil søkjer om konsesjon for å utvinna nye olje- og gassfelt. Men han vedgår at statsoljeselskapet gjer litt som dei vil.

– Vi har ikkje lenger noko fullt styringsrom der stortinget i detalj kan styre korleis selskapet skal operere, men vi må formidle eit kraftig uttrykk for kva vi meiner. Vi ønskjer at oljenæringa skal gi ringverknader langs heile kysten, seier han.

– Statoil tek samfunnsansvar

Informasjonssjef i Statoil, Ørjan Heradstveit, seier marginane i olje- og gassektoren er under press og at dei må effektivisere drifta for å vera konkurransedyktig på lang sikt. Han meiner statsoljeselskapet tek samfunnsansvar i Florø sjølv om dei flyttar arbeidsplassar til Mongstad.

–Vi hjelper til det lokale utviklingsarbeidet i regionen innanfor fleire område med dei partane som er der.

På direkte spørsmål om Statoil kjem til å sentralisera meir av aktiviteten sin på land i åra som kjem, svarar Heradstveit slik.

– Dette vil kontinuerleg innebere at vi må sørgje for at vi er effektive i våre operasjonar for å sikre konkurransekraft.

– Det betyr at vi vil sjå meir sentralisering framover?

– Det vil tida vise, seier han.

• LES OGSÅ: Følling krev handling om oljebasen
• LES OGSÅ: Ministeren vil ikkje løfte ein finger for oljebasen i Florø

Meiner Florø må sjå andre moglegheiter

Forskar Tyson Weaver har saman med ein kollega gjennomført ei gransking blant 215 norske energibedrifter. Halvparten av dei spurde verksemdene i oljeindustrien har planar om å skaffa seg fleire føter å stå på, innan fornybar energi.

Ei slik omstilling, kan vera ei av løysingane for Florø, meiner Weaver.

– Dei er ganske sårbare på grunn av oljen som primærnæring. Difor må politikarane sjå moglegheita for omstilling innan andre industriar. Eit god døme er den nye subsea-ingeniørutdanninga i Florø. Det er ei nisje som bransjen har behov for, seier Weaver.