– Det er rett og slett ei forgløyming. Eg kan ikkje tenkja meg at nokon medvite har late vera å registrera seg, seier ordførar Matias Råheim (H) i Gaular.
– Rein sløvskap, seier ordførar Jan Olav Gjerde (Ap) i Hyllestad.
– Ikkje godt nok. Dette får eg berre ta tak i og syta for at det blir gjort slik det er tenkt å vera, seier ordførar Ottar Nygård (Tverrpolitisk liste) i Selje.
Unngå spekulasjonar
Dei er berre tre av ei rekkje ordførarar i landet som ikkje har skrive styreverva sine inn i eit ope register på nettet.
Sidan 2007 har kommunane sin interesseorganisasjon KS prøvd å få lokalpolitikarar, rådmenn og kommunalsjefar til frivillig å føra opp alle styreverva sine. Men etter åtte år manglar framleis 93 kommunar. Ein av dei er Selje. Ordførar Nygård lovar bot og betring:
– Eg òg ser behovet for at slike ting er heilt oppe i dagen, slik at det ikkje blir spekulasjonar rundt det.
(Artikkelen held fram under biletet.)
Betente saker
Det er mange døme på at lokalpolitikarar har interesser i betente saker i ein kommune. I vesle Solund blei nesten halvparten av dei folkevalde ugilde då kommunestyret skulle seia ja eller nei til å byggja tre omstridde vindindustriparkar for tre år sidan.
– Lokalpolitikarar er ofte engasjert i lag, organisasjonar eller verksemder. Difor er openheit om roller og interesser kanskje spesielt viktig i små kommunar, der ein møter på dei same folka i ulike samanhengar, seier ordførar Gjerde i Hyllestad, ein av kommunane som ikkje har registrert seg.
(Artikkelen held fram under biletet.)
– Dobbeltarbeid
I Vågsøy diskuterte kommunepolitikarane om dei skulle føra seg opp i styrevervregisteret til KS, men sa nei inntil vidare. Sidan private og offentlege styreverv og stillingar allereie er å finna i Brønnøysundregistra og Kommuneregisteret, blir eit eige styrevervregister unødvendig dobbeltarbeid, meiner ordførar i Vågsøy, Morten Hagen (H).
– Ein må visa forståing for at registeret kan opplevast arbeidskrevjande, seier direktør Kjell-Torgeir Skjetne i KS.
KS gjorde difor i fjor styrevervregisteret sitt mindre innfløkt. Politikarane treng ikkje lenger sjølve skriva inn verva sine - det er nok med eit vedtak i kommunestyret eller fylkestinget, så kjem opplysningane automatisk inn – og blir årleg oppdaterte – i styrevervregisteret.
(Artikkelen held fram under biletet.)
Fleire seier nei
Men forenklinga har ikkje gitt resultat. I dag er det fem færre kommunar som har registrert enn for eit år sidan. Skjetne meiner likevel registeret er viktig for å kontrollera at pol
– Det betyr mykje for tilliten folkestyret og forvaltninga lokalt. Me meiner registeret er lett tilgjengeleg for dei aller fleste og gir dermed meir openheit både for innbyggjarane og media.