Vestlandet sitt flytande bibliotek har dei siste åra levd eit uvisst liv i Sogn og Fjordane.
Også i år var fjordfylket sine løyvingar føreslått kutta av fylkesadministrasjonen. Det vart i dag blankt avvist av Finansutvalet.
- LES OGSÅ: Vil berge 50-årsjubilanten
– Det har blitt stilt ein del spørsmålsteikn om tida har sprunge ifrå den, men evalueringa som er gjort viser at bokbåten har ein positiv funksjon og misjon i grender den oppsøkjer, seier fylkesordførar Åshild Kjelsnes (Ap).
Full semje
Rapporten som vart lagt fram i oktober overtydde politikarane til å halde fram støtta. Då Finansutvalet møttest i dag, stod det om ja eller nei til 600.000 kroner til båten. Fylkesrådmannen si innstilling var nei.
No går innstillinga vidare gjennom hovudutval og fylkesutval, før fylkestinget gjer endeleg vedtak på desembermøtet.
– Det var tverrpolitisk semje om å ta båten inn att, men to ulike fraksjonar på korleis ein skulle finansiere dette, seier Kjelsnes.
Vil følgje opp
Men det stoggar ikkje der. For politikarane bestemte seg for å leggje inn ei lang rekkje fleire ting. Til dømes bestemte dei seg for å følgje opp løyvingane til knutepunktfestivalane Opera Nordfjord, Førdefestivalen og Norsk Country Treff med 900.000 kroner.
Samt 500.000 kroner til ei trainee-stilling. Dei tek også sikte på å realisere eit felles museumsmagasin i Movika og visingssenter for Gulatinget.
350.000 kroner finn dei på Fylkestuvalet sin eigen konto, medan administrasjonen også skal slankast.
– I løpet av 2014 må fylkesrådmannen sjå på innsparingstiltak i sentraladministrasjonen, seier Kjelsnes.
– Ikkje ofte
Utfordringa er innsparingar på to millionar i 2015, det doble året etter og sju millionar i 2017. Med endra oppgåver for fylkeskommunen, meiner politikarane det er fornuftig å sjå etter innsparingar i eigen administrasjon.
– No skal ein sjå etter innsparingar, og så kjem fylkesrådmannen attende til oss så vi får vurdert dette. Det treng ikkje vere noko negativt i det, men det er heller ikkje noko vi ofte raslar med, svarar Kjelsnes på spørsmål om administrasjonen ofte må gjere kutt i eigne rekkjer.