Med fleire heimvende spelarar, feia 3. divisjonsklubben frå Naustdal tabelljumboen i eliteserien av bana.
Til slutt stod det 3–0 (25-17, 25–14 og 25-13) til vertane.
– Vi tok ikkje for lett på oppgåva, men vi har eit ungt lag. Det er mange unge som kanskje kjenner stort press på skuldrene i kampane, seier Katarzyna Ciesielska.
Kunne smile
Ei som kunne glise breitt etter oppgjeret, var tidlegare Førde-spelar Hilde Elvebakk. Naustedølen som har sanka poeng etter poeng gjennom fleire år i eliteserien. No har ho byrja på studium som vil krevje fleire helgesamlingar.
- Les også: Poengsankaren er lei av bronsemedaljar
– Det var veldig, veldig kjekt. Mykje folk, god stemning i hallen og rett og slett kjempekjekt å treffe att og spele mot gamle kjente, seier naustedølen.
– Vi visste vel eigentleg ikkje kva vi gjekk til. Eg trur det var mange som kjende på nervane i dag tidleg. Vi kom til kampen som underdogs, men så fort vi bikka åtte poeng følte eg at vi hadde grei kontroll, legg Elvebakk til.
Trur ikkje på finale
Tambarskjelvar stiller eit ungt lag i 3. divisjon, men sende eit rutinert mannskap i kamp mot naboklubben Førde.
- Les også: Sytte for 42 poeng i ein og same kamp
I tillegg til den tidlegare landslagsspelaren Elvebakk, har åtte tidlegare spelarar gjort comeback for å ta Tambarskjelvar så langt som mogleg i cupen.
– Rutine og servepress vart nok avgjerande, seier Elvebakk og legg til:
– No blir kvartfinalane trekt i morgon, så vi håpar på lettast mogleg motstand. Men det blir nok vel håpefullt å tru at vi går heile vegen til finalen. Vi får ta ein kamp av gangen, seier ho.
I Førde-leiren vedgår trenar Ciesielska at det ventar litt arbeid kommande veka. Neste helg ventar Oslo Volley.
– Jentene er unge og presterer veldig bra på trening. Utfordringa er å få det ut i kamp , seier ho.