NRK Meny
Normal

13 til sjukehus: Slik ser bilen ut etter brannen

Alle som var i Fjærlandstunnelen då det byrja å brenne i ein feiebil seint måndag kveld, har tilbrakt natta på sjukehuset i Førde.

Feiebilen som bann i Fjærlandstunnelen

DAGEN DERPÅ: Feiebilen som tok fyr er heilt utbrent. Den blei taua ut på Fjærlandssida av tunnelen.

Foto: Jo Marius Bøyum

Tretten unge vaksne kom seg ut av tunnelen og blei sende til Førde sentralsjukehus med røykskadar.

Overlege

ALLE LETTARE SKADDE: Overlege ved Førde sentralsjukehus, Mona Skivenesåg Løvø, kunne natt til tysdag melde om at alle tretten var lettare skadde.

Foto: ODDLEIF LØSET / NRK

– Dei er lettare skadde og stabile. Det er snakk om røykskadar. Vi har tatt blodprøver og vurdert oksygeninnhald i blodet. Alle er lagt inn for observasjon over natta, seier overlege ved Førde sentralsjukehus, Mona Skivenesvåg Løvø.

Brannen starta i feiebil

Det blei meldt om brann i den 6,3 kilometer lange Fjærlandstunnelen mellom Jølster og Fjærland seint måndag kveld.

– Det byrja å brenne i ein feiebil som dreiv reingjering inne i tunnelen. Trafikken har blitt leia gjennom tunnelen med leiebil i samband med dette vegarbeidet då brannen oppstod, seier innsatsleiar Synnøve Domben til NRK.

– Veit ein noko om brannårsaka?

– Det er ukjent no, så det må den vidare etterforskinga finne ut av. 13 personar er frakta til sjukehus, og det er alle dei som var i tunnelen då det byrja å brenne.

Tunnelbrann pasientar på sjukehuset

MANGE PÅ SJUKEHUS: Førde sentralsjukehus blei sett i alarmberedskap. Alle som var i tunnelen blei eksponert for røyk.

Foto: Oddleif Løset / NRK

Nesten ny bil

Driftsleiar Eyvind Brynildsen i Asfalt Remix fortel at det byrja å brenne i deira feiebil.

– Såføren vår hoppa ut av bilen og sprang vekk i retning utgangen av tunnelen, fortel han.

– Kvar i bilen byrja det å brenne?

– Det har vi så langt inga formeining om. Brannen utvikla seg svært raskt, og det var berre å kome seg vekk, seier Brynildsen. Han fortel at lastebilen som byrja å brenne var ein Scania R 580 2015-modell.

– Bilen hadde det mest moderne utstyret og var nesten ny, seier Brynildesen. Han vil ikkje spekulere i kva som kan vere årsaka til brannen.

Tunnelbrann

HER STARTA BRANNEN: Feiebilen tok fyr inne i Fjærlandstunnelen.

Foto: Sogn brann og redning

Sjukehuset blei mobilisert

Helse Førde kalla inn ekstra mannskap i ambulansetenesta, AMK, akuttmottak, laboratoriet, sentralbord og kjøken. Også psykososialt kriseteam blei mobilisert.

– Vi har oppretta ein telefon for pårørande som er 57831700, seier Terje Ulvedal, kommunikasjonssjef i Helse Førde, til NRK.

Situasjonen var uoversikteleg

Ein spylebil tok fyr éin kilometer inne i den 6,3 kilometer lange tunnelen frå Jølster-sida.

– Situasjonen var uoversiktleg. Personar sprang i alle retningar då brannen oppstod, seier Espen Rysjedal i Alarmsentralen.

Det var trafikkavvikling ved hjelp av leiebil med seks personbilar då brannen starta. Det var to spylebilar og ein feiebil som arbeida inne i tunnelen.

Brannmannskap frå både Jølster og Sogn var kalla ut. Det blir no gjort ettersløkking på staden.

– Det har vore ein utfordrande innsats for mannskapet med tanke på at betong fell ned frå taket, seier Vidar Trettenes, som er brannsjef i Sogn brann og redning.

Tretten personar er lettare skadde etter brannen i Fjærlandstunnelen på riksveg fem mellom Jølster og Sogndal.

DRAMATISK BRANN: Tunnelen er heilt sentral i sambandet mellom Møre og Romsdal og fylka sør i landet.

Uvisst kor lenge tunnelen vil vere stengt

– Her er det snakk om stor varme. Det var 500 liter diesel og 700 liter hydraulikkolje på feiebilen. Tunneltaket gir etter enkelte stader i tunnelen. Eg trur ikkje tunnelen vert opna att dei første dagane. Taket vil losne på grunn av varmen i fjellet, seier Rysjedal.

For brannmannskapet er det vanskelege forhold i den over 6000 meter lange tunnelen.

– Det er så og sei sløkt inne i tunnelen. No må mannskapet få røyken ut, seier Rysjedal.

Laster kart, vennligst vent...

NAUDETATANE PÅ VEG: Naudetatane er på veg til ein brann i Fjærlandstunnelen.

Den nye regjeringa vurderer å kvitte seg med odelslova. Det kjem ikkje på tale, svarer bøndene.
Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.