13-åring las høgt for barneskuleelevar – frå eiga krimbok

– Åå, ver så snill og hjelp meg. Det er så mykje blod, utover graset og oppover trea.

13-åringen Sander Solheim Klakegg sparte ikkje på dei skumle kapitla då han las for elevane på Flatene barneskule i dag.

Boka han las frå, «Eit ess i ermet», har han skrive heilt sjølv.

Krim i eigen heimstad

– Boka handlar om at nokon finn ein død mann ved Bekkjavatnet i Førde. I tillegg er det ein gut som er forsvunnen, så då må politiet finne ut kva som har skjedd.

Boka som er 51 sider lang tok han nokre månadar å skrive.

– Ideen berre kom til meg, og eg grubla på den i ei stund før eg skreiv ho. Eg er glad i å lese så eg hadde lyst å lage mi eiga forteljing, seier Sander.

Etter å ha lese høgt frå boka til barneskuleelevane, måtte han svare på spørsmål frå salen.

– Dei spurde meg om alt ifrå kva favorittmaten min er til kva eg synest er gøyast ved å skrive.

• Les også: Her er sju bøker borna vil elske

Blei inspirert

Veronica Sjåstad Agnedal (9) var ein 4.-klassingane som høyrde på då Sander las frå boka si.

– Han var veldig flink, men det var litt skummelt då han prata om blod og sånn i boka, seier ho.

Vennene Oda Emeline Gjervik Hagenes (9) og Tobias Skåre Kristiansen (9) er einige.

– Boka var veldig bra og spennande, meiner Tobias.

– Det høyrest veldig kjekt ut å skrive ei slik bok, så eg fekk lyst til å skrive ei krimbok, eg og.

I gong med oppfølgjaren

I løpet av spørjerunden med barneskuleelevane kom det fram at Sander er i gong med endå ei krimbok, der dei same karakterane må prøve seg på eit nytt krimmysterium.

• Les også: Tida (10), Olav (10), Knut (46) og Ina (10) vurderer bøker

– Den nye boka handlar om eit nytt narkotisk stoff som er kome til Noreg, og at det er spesielt mange som døyr av det her i Førde. Så då må politiet på nytt finne ut kvifor dette har skjedd, fortel 13-åringen.

Boka «Eit ess i ermet» kan ein finne på biblioteka i Naustdal og i Førde.