- Eg kjenner denne formuleringa godt. Den står i talemanusa frå næringsdepartementet og vert brukt nesten alle stader i Norge der næringsministeren reiser. Dette kjenner eg godt til, og det er berre eit forsøk på å dempe temperaturen i dette møtet, hevdar Lars Sponheim.
Sponheim som var næringsmininster frå 1997 til 2000 går langt i påstå at signalet om statlege arbeidsplassar til Årdal er rein bløff. Han seier det er eit velkjent knep å love å vurdere etablering av statlege arbeidsplassar.
- Dette er standard. Og legg merke til at det ikkje vart lova arbeidsplassar, men at det skulle vurderast. Det blir heilt sikkert vurdert, men det kjem ikkje til å verte mange jobbar ut av det.
- Årdal har liten sjanse
Sponheim hevdar sjansen for å få statlege arbeidsplassar til Årdal er svært liten.
- Det vert etablert svært få nye statlege arbeidsplassar. Dei få som det er snakk om er på sjukehusa og i politiet. Men den veksten må nødvendigvis skje der det er pasientar eller kjeltringar, og ingenting er det spesielt mykje av i Årdal, hevdar Venstre-leiaren.