- Heilt sinnsjukt å slå Brann

- Det er heilt ubeskriveleg. Det er vanskeleg å tenke at noko slikt skulle skje. Det er sinnsjukt. Det er kanskje det rette ordet, jublar Ferstad medan han er på veg ut dørene for å treffe lagkameratane for å markere 1-0-sigeren.

- Eg skal på jobb i morgon, så vi må halde det med måte, legg Ferstad til.

- Var bra med

Det tidlegare storlaget frå utkanten av bergensområdet bretta opp ermane for å gje langt meir meritterte Brann så god kamp som mogleg. Då det framleis stod 0-0 til pause, såg fyllingenspelarane ei cupbombe i det fjerne.

• LES OGSÅ: Omfavnet hverandre med jubelkyss

- Eg tykkjer vi klarde å henge bra med i deira tempo. Då vi kom til pause så hadde vi trua på at det kunne gå. Vi gjekk ut i andre omgang som i første og spelte ball, fortel Ferstad som spelte heile kampen som midtstoppar.

(Artikkelen held fram under TV-saka)

Cupbombe

Då Kristoffer Stephensen stanga inn 1-0 ni minutt etter kvilen, vart håpet sterkare. Vel halvtimen seinare var cupsensasjonen eit faktum .

- Ein må gå til kvar kamp med håp om å vinne. Det gjorde vi i dag også. Dersom vi heva oss nokre hakk og dei undervurderte oss og fall ned nokre hakk, så visste vi at vi kunne klare det, seier Ferstad.

- Du får testa deg

Også den tidlegare Tornado Måløy-spelaren Tore Rylandsholm fekk speletid mot Brann. Han kom inn som innbyttar fire minutt før full tid. Brann stilte ikkje noko dårleg lag til oppgjeret. I startoppstillinga var mellom andre Jan Gunnar Solli, Hassan El Fakiri, Erik Huseklepp og Diego Guastavino.

I tillegg køyrde trenar Steinar Nilsen inn Bjørnar Holmvik, Cato Guntveit og Petter Vaagan Moen etterkvart som han såg kva veg det bar.

- Vi håpa at dei skulle stille best mogleg lag. Då får du testa deg sjølv kor god du er. No får vi håpe på eit godt lag i neste runde, seier Ferstad.

- Innsats er stikkordet

I år er det 20 år sidan Fyllingen tok seg til finalen ved å slå Brann 2-0 i semifinalen. Sidan har Fyllingen gått frå eliteserien til 3. divisjon. Brann har teke både serie- og cupgull.

- Korleis er det mogleg for eit 3. divisjonslag å slå ut eit eliteserielag?

- Innsats er eigentleg eit godt stikkord. Eg vil ikkje snakke om brann, men tykkjer vi gjorde ein god jobb. God laginnsats, seier Ferstad.

(Artikkelen held fram under TV-innslaget)

Ynskjer Rosenboreg

Medan branntrenar Nilsen vedgår det er krise hos raudtrøyene , håpar Ferstad på sterkast mogleg motstand også i fjerde runde av cupen.

LES OGSÅ:

- Vi tenkte med ein gang Rosenborg. Det hadde vore vannvittig kult, seier han.

- Ja, å slå ut både Rosenborg og Brann?

- No er det ikkje snakk om å slå ut Rosenborg. I første omgang er det berre å spele mot dei så får vi ta det derifrå, ler midtstopparen frå Høyanger.

P.S. I ein annan cupkamp vann Sogndal 3-2 over Førde .